Shillong, Lber 16: Palat 27-28 ngut ki briew kila shah kem ha kaba iadei bad ka jingkulmar bad jingjia iaumsnam kaba la jia ha rilum Garo.
Haba pyntip ia kane hynne ka sngi Nyngkong, u Symbud Myntri Rangbah ka jylla uba khmih ia ka Home (Police) u Bah Prestone Tynsong ula ong, “Ym duna ia ka 27-28 ngut kiba la shah kem haduh mynta”.
“Mynta lada phi dang kylli biang ia nga shaphang kane, Nga ong ba ai ba ki pulit kin iaid shakhmat ban pynlong ia ka jingtohkit kaba bniah. Ngam lah ban ong eiei mynta, lehse kin dang don shuh kiban shah kem” ula ong.
“Ngin ieh beit ha ki pulit ban peit ba kum kitei ki jingjia kim dei shuh ban iai jia ha ki por ban wan”.
Ula bynrap ba katei ka jingkhmih bniah kan long palat wat ia ka West Garo Hills.
“Kam die eh thik tang ha West Garo Hills. Kadei ban long ha ka thain baroh kawei. Lehse naduh nangne hynrei ai ba ka jingtohkit kan iaid shwa shakhmat. Ngi ngin leit shaduh ka bynta kaba kut jong katei ka mat”.
U Symbud Myntri Rangbah ula pynthikna ba ka sorkar ka dang khmih bniah ia ki ejahar kaba la kynthup ia ka kyrteng jongu MLA barim u Esmatur Mominin bad ula kyntait ban kren eiei halor katei ka jingshah kem jong u MDC barim u MDC Sofior Rahman katba ka jingtohkit ka dang iaid shakhmat.
“Ai ba ka jingtohkit kan iaid shwa shakhmat” ula ong.
Katkum ka jingpynpaw u Bah Tynsong, ki hukum pynjari korphiw kin iai neh tang shu la kem dum, katba ki bor sorkar kin dang khmih bniah lano ban weng noh ia ka korphiw.
“Kumba long mynta ka korphiw kan iai bteng ban treikam ha ka por mynmiet bad ha kajuh ka por ngin sa peit haduh katno kloi ngin lah bna weng noh ia ka jingpynjari ia ka korphiw bad kumjuh ban weng noh ia ka jingkhang khyrdep ban pyndonkam ia ka kor internet” la ong u Bah Tynsong.
