Kaziranga, Nailur 26 :U nongialam niam ba pawkhmat u Sadhguru bad u Myntri Rangbah (CM) ka Assam u Himanta Biswa Sarma kila shah ujor da ka FIR halor ka jingkynnoh pynkhein ia ki kyndon ain kiba iadei bad ka jingleit shangkai sngewbha hapoh Kaziranga national park ha ka por mynmiet.
Ia kane ka FIR la ujor pyrshah hapoh Bokakhat police station ha Golaghat district ka Assam da ki briew kiba shong ba sah ha Kaziranga national park.Na ka liang ki bor pulit kila pyntip ba ka jingtohkit halor kane ka bynta kala dep iaid shakhmat.
U CM ka Assam u Himanta Biswa Sarma bad u nongialam niam ba pawkhmat u Jaggi Vasudev ia uba la tip bha kum u Sadhguru kila ngat ha ka jingshah ujor namar ka jingpynlut por ha kaba leit shangkai sngewbha hapoh Kaziranga National Park bad Tiger Reserve ha ka miet sngi Saitjain ba la lah.
U Sadhguru, uba la wan poi ha Kaziranga na ka bynta ban plie ia ka jingialang kaba lai sngi ba la khot pynlong da ka sorkar Assam ha kane ka miet sngi Saitjain ba la lah ula ialam na ka bynta katei ka jingleit shangkai sngewbha sha katei ka park hadien ba kila mih na Mihimukh.
Une u nongialam niam ula pynlut ia ka por ha ktei ka miet ha ki bynta ka central range jong katei ka park ha ryngkat u CM Himanta Biswa Sarma, u myntri ka tnat Tourism u Jayanta Malla Baruah nalor ki heh sorkar jong ka park bad ki heh ka tnat Forest.
Ki tyllong khubor ki iathuh ba katkum ki kyndon, la khang pyrshah ban leit shangkai sngewbha shapoh katei ka park hadien ba ka sngi ka la sep namar ka lah ban buh jingeh ia ki mrad khlaw kiba don ha kane ka jaka.
Katkum ka website na ka Kaziranga National Park, ka jingleit shangkai kaba da ki jeep bad ki hati hapoh kane ka jaka jngohkai ka long naduh 8 haduh 10 baje mynstep bad tang naduh 2 haduh 4 baje jan miet.
U heh ka KNP u bym kwah ban pynpaw kyrteng ula ong ba la khang pyrshah iano iano lait noh ia ki heh ba dei khmih jong kane ka party bad ki nongtrei jong ka ba kin rung hapoh kane ka park hadien ka 5 baje jan miet.
Haba pynpaw ka jingsngewkhia kaba jur, ka nongtrei kaba khmih halor ka jingpynneh pynsah ia ki mrad khlaw, ka Mubina Akhtar kala kynnoh ia u Sadhguri halor ka jingpynkhein ia ki kyndon jong ka Wild Life (Protection) Act, 1972 bad ka kyndon Prevention of Cruelty to Animals Act, 1960.
“Kane ka dei ka jingpynkhein ia ki kyndon ain jong ka tnat wildlife.U Sadhguru uba la kam ialade kum u riew ieit mariang um don ka jingtip kaba wat tang khyndiat ruh ha ka ba iadei bad ki lad jingiada na ka bynta ki mrad khlaw?” ong ka Akhtar lyngba ka lad pathai khubor.
Lah ban kdew ba ha u bnai Naitung mynta ka snem, ka tnat National Tiger Conservation Authority (NTCA) ka la kyntu ia ka sorkar Madhya Pradesh ba ka dei ban pynsangeh shisyndon ha kaba iadei bad ka jingleit shangkai shapoh ki park kiba la buh kyrpang ia ki khla ha ka por mynmiet ha ka jylla namar ka lah ban ktah ha kaba iadei bad ka jinglong jingman ka jong ki.
Ka NTCA ha ka shithi sha ka tnat forest ka sorkar jylla kala ong ba kane ka jingleit shangkai sngewbha ha ka por mynmiet sha ki park ka pynmih ia ka jingsawa ha kine ki jaka ba don ki mrad khlaw.
“Ki mrad khlaw ki ju kyndit lyngba ka jingthaba jong ki light kali.Kine ki pynlong ruh ia kine ki mrad khlaw ba kin klumar jingmut namar ka jingmlien lyngba ka jingshai kaba la pynlong hi lyngba ka jinglong jingman jong ka suin bneng,” ong ka NCTA.
