Shillong, Lber 15 : U Myntri Rangbah ka Jylla Conrad K Sangma ha ka sngi U Blei, ula lum ia ka jingialang bishar kam ba kyrkieh bad ki heh Ophisar ban lum jingkhein ia ki jingjulor bala wanrah da u phria ha kylleng ki jaka jong ka Jylla.
U phria uba jur ula lynshop ha kylleng ki jaka kynthup ha ki bynta ka ri-lum Khasi Jaintia bad ka ri-lum Garo ruh khamtam ha Tura, kala sakhi ia ka jinglynshop u phria ba heh kat ki bol golf hynne ka step por 3 baje, kaba la pynjulor ia bun tylli ki Iing, ki kali bad ki jingthung jingtep.
Une u phria ula neh kumba 20 minit bad pynpei thliew lut ia ki tnum iing tin bad ki iit kali kiba pynieng harud ki surok bad ki jaka madan ki bym don jingker.
Ha kane ka jingialang la iashimbynta da u Chief Secretary, u Commissioner & Secretary ka tnad Revenue and Disaster Management bad ki Deputy Commissioner jong ki District kiba shah ktah.
Ha ka jingialang, u Myntri Rangbah ula bthah ia ki heh Ophisar ba kin peit thuh bha ia ka jinglong jingman bad ban pynthikna ba kin ai ia ki jingiarap ba mar dor sha ki longiing kiba shah ktah khlem ka jingpynslem.
Ula bthah ruh ia ki bor district ba kin shim kyrkieh ia ki sienjam ban pynbha bad maramot biang ia ki jingtei kiba donkam u paidbah ba man ka sngi kynthup ka jingpynpoi umbam umdih, ka bor ding elektrik bad kiwei kiwei.
La bthah ia ki Ophisar ba kin peit ngor bad iatreilang bad ki bor shnong ha kaban lum jingkhein ia ki jingjulor bad ban lei tai jingiarap kham kloi ia ki briew kiba shah ktah ha une u phria.
