Guwahati, Lber 15: U Myntri Rangbahduh ka ri Narendra Modi, ha ka sngi saitjain, u la sangah tyngeh ia ka Indian National Congress, da kaba kam ba katei ka seng, ka ia kynduh ia ki jingeh ba khraw kiba iai bteng ha ka elekshon ha kylleng ka ri bad shen, ka lah ban buh jingthoh ia ka “spah snem jong ka jingshah rem.”
Haba kren ha ka jingialang paidbah ha Silchar hadien ba la plie ia ki projek kam pynroi ba kongsan, u Modi u la ong ba ka Congress la “ioh jingsngneng bad ka jinghikai hajan ma pa kawei pa kawei ka jylla” ha ka ri.
“Mynta, man la ki jylla ha ka ri ki ai jinghikai ia ka Congress.Ka seng kaba shah rem elekshon kawei hadien kawei bad ka lah ban kynjoh shen ha ka spah snem jong ka jingshah rem”, ong u Myntri Rangbahduh ka ri.
U Modi u la kren ïa kane ha ka jingïalang plie paidbah ïa ka Shillong–Silchar High-Speed Corridor, ha kaba u la leh ïa ka Bhoomi Pujan na ka bynta ka project kaba u la niew kum ka first access-controlled greenfield four-lane high-speed corridor ha Northeast India.
Haba jubab ïa ka jingkynthoh ka Congress halor ka jingheh jong ka projek, u Modi u la ong, “Shu kylli tang ïa ki nongïalam ka Congress shaphang ka projek kaba shongdor ₹24,000 klur.Ai ïa ki ïa u khulom bad ka kot sada bad bthah ïa ki ban thoh ïa ka jingkheiñ — kin ym lah wat ban leh ïa kata.”
U Myntri Rangbahduh u la kynnoh ba ki sorkar Congress kiba la bud ryntih ki la iehnoh bein ia ka roi ka par jong ka thain shatei lam mihngi da ki phew snem hadien ba la ioh ia ka jinglaitluid.
U la ong ba ia ka thain la buh slem palat “jngai na Delhi ha baroh ar ka jingpyrkhat bad ka jingsngew,” kaba la pynlong ia ki jylla ha ka thain shatei lam mihngi ban shah pynduh ia ki jingtei bad ki lad kamai.
Haba phai sha ki jingjia ha ka histori hadien ka jinglaitluid, u Modi u la kynnoh ba ki rai halor ki kam khappud ba la shim ha ka por jong ka Congress ki la pyntlot ïa ka Barak Valley kum ka jaka pdeng jong ka khaii pateng kaba kongsan.
“Ka Barak Valley kaba la tip mynshuwa kum kawei na ki lynti ka kongsan jong ka khaii pateng bad ka jaka karkhana.Hynrei ka rukom shna pud ka la ot noh ïa ka jingïoh rung kaba kongsan jong ka sha ki lynti duriaw, kaba la pyntlot ïa ka bor kamai jong ka,” u la ong.
Shuh shuh u la ba watla ki la don ha ka bor da ki phew snem, hynrei ka sorkar Congress kam shym la leh ei ei ban kyntiew ia katei ka thain.
Haba pynpaw ïa ka jingthmu pynroi jong ka sorkar, u Modi u la ong ba ka sorkar ba la ïalam da ka BJP ha ka Centre bad ha Assam ka trei ban pynim biang ïa ka Barak Valley kum ka jaka ba jaka pdeng na ka bynta ka khaii pateng.
U la kdew sha ki lad jingïarap na ka bynta ki nongrep, da kaba pynpaw ba ₹20,000 klur la transfer beit sha ki nongrep ha Assam ha kine ki phew snem ba la dep lyngba ki skhim ka sorkar pdeng.
“Pyrkhat bha ïa kane — tang hapoh shi snem, ₹20,000 klur ka la leit beit beit sha ka pla jong ki nongrep, Ha ki shi phew snem ba synshar ka Congress, wat la u Myntri Rangbahduh u dei na Assam, ki nongrep hangne kim shym la ïoh ïa ka jingkyrshan kaba kum kata,” u la ong.
U Myntri Rangbahduh u la kynthoh ruh ïa ka Congress halor ka jingïakhih kaba dang shen ha ka jingïalang jong ka AI summit, ha kaba ki nongïalam jong ka seng ki la pynlong ïa ka jingïakhih khlem jain ne shirtless demonstration.
U Modi u la kynnoh ba ka seng kaba don ha ka liang pyrshah ka pyrshang ban pynsniew ia ka dur jong ka India namar ka jingsngewsih namar ka jingshah rem man ka por ha ka elekshon.
“Namar ka jingshah rem, ka Congress ka la sdang ban thew ïa ka jaitbynriew jong ka ri hi.Haba ka jingthmu ban pynjah burom ïa ka AI summit, ki nongïalam ka Congress ki la pynpait wat ïa la ki jong ki jaiñ kum ka jingpyrshah.Ka long kumba kim don ei ei shuh ban leh lait noh tang ban tar ïa la ki jong ki jaiñ ha ka jingduh jingkyrmen,” u la ong.
U myntri rangbah u la bynrap ba ka ri ka la shim khia ia kane ka jingjia bad pynrem ia kum kine ki jingleh.
