Shillong, Lber 13 : Ka Tnad Pulit kala pynngat case hapoh ki kyndon ka Arms Act pyrshah ia uwei u Pulit hadien ka jinglap ia ki kuli bad ka uniform hapoh ka jaka sah wai ba don ha phyllaw ka Mosque ha Williamnagar, East Garo Hills.
U Superintendent of Police ka East Garo Hills, Bah SA Rynjah ula iathuh ba ki nongshongshnong katei ka jaka kila pyntip ia kane ka jingjia sha ki Heh Pulit ha ka step sngi Thohdieng.
Ka jingtohkit ja shem ba u Pulit ka East Garo Hills DEF, uba don mynta ha ka shuti, ula buh ia 4 tylli ki kuli bym pat pyndonkam, ka uniform camouflage, belt, boot bad kiwei ki tiar ha ka kamra jong u ha ka jaka ban leit aiti ha ka jaka buh tiar jong ka Tnad Pulit.
“Ban buh ia ki tiar siat ha ki jaka shimet ha ka jaka ban leit aiti sha ki jaka buh tiar ka Tnad ha ka por ba shim shuti, ka dei ka bym shah satia” ong u Bah Rynjah haba bynrap ba ia kine ki tiar la kurup noh bad la register case ia une u Pulit hapoh ka Arms Act.
Ha kajuh ka por, u SP ula kyntu ia ki paidbah ba kim dei ban pynsaphriang ia ki khubor lamler ha ki rynsan social media da ki jingthmu ba sniew.
“Lada ym kohnguh ne ialeh pyrshah ia kane ka jingkyrpad, yn shimkhia bha ia ka bad kan khring ia ki jingpynshitom kat kum ka ain” ula maham.
