Shillong, Lber 12 : Ka Jaintia Revolutionary Council (J.R.C.) Sengkmie, ka pynpaw ia ka jingpyrshah kaba tyngeh halor ka jingthmu ban pynlong ia ka Environmental Public Hearing halor ka kam tih mawshun “Mynkre Limestone Mine” jong ka M/s TNE Cements Private Limited.
Ka J.R.C. ka la phah ia ka shithi pyrshah sha ki bor ba halor kiba kynthup ia u District Magistrate ka East Jaintia Hills, u Member Secretary ka Meghalaya State Pollution Control Board (MSPCB), bad sha ka Meghalaya State Environment Impact Assessment Authority (SEIAA).
U President ka JRC Bah L Suiam, ula iathuh ba lyngba kine ki shithi, ka Council ka dawa ba dei ban pynsangeh noh mardor ia kane ka jingbishar paidbah (Public Hearing) namar ki jingbakla bad ki jingma kiba khraw kiba don ha ka kaiphod jong ka company.
Hadien ba la bishar bniah ia ka kaiphod(Executive Summary Report) jong kane ka projek, ka J.R.C. ka la lap ba kane ka jingtih mawshun kan wallam ia ka jingma kaba khraw ia ka koit ka khiah ki paidbah, ka um bam um dih, bad ia ki mrad khlaw ha kane ka thain.
Ki mat ba khraw ba ka J.R.C. ka pynshong nongrim ia ka jingpyrshah:
Ka jingma ia ka um bam um dih: Kat kum ka report, ka um ha kane ka thain ka la don lypa ka jingbit tngit (Magnesium) kaba kynjoh haduh 49.20~mg/l, kaba la palat ia ka rukom ba bit ban dih (30~mg/l). Ka jingtih mawshun kaba khraw kan nang pynjaboh bad kan pynduna ia ka um ha ki 39 tylli ki shnong ba don sawdong.
Ka jingma ia ki mrad khlaw:
Kane ka jaka tih mawshun ka don tang 8.61 km na ka Narpuh Wildlife Sanctuary. La lap ba don kumba 19 jait ki mrad kiba la hap ha ka thup Schedule I, kum u Shrieh Lber (Hoolock Gibbon), u Dngiem (Sloth Bear), bad u Khla (Clouded Leopard). Ka Council ka kynnoh ba ka jingtih mawshun khlem ka plan kaba paka kan pynduh jait ia kine ki mrad.
Ka jingsawa kaba palat pud:
Ka jingsawa ha ki jaka shong shnong ka la palat lypa ia ka pud ba la buh (55 dB). Ka jingpyndam ia ki maw da ki tiar kiba khraw bad ka jingiaid ki trok kiba khia kan pynwit shibun ia ka shongsuk shongshngain bad ka koit ka khiah ki paidbah.
Ki jingtip kiba la rim bad kiba bakla:
Ka Council ka la lap ba ki jingshisha ba la kdew ha ka report halor ka khyndew (soil quality) ki dei kiba naduh u snem 2023, kaba mut ba kim lah shuh ban pynshisha ia ka jingshisha mynta u snem 2026.
Ka jingktah ia ki trai ri trai muluk:
Palat 96% ki briew kiba shong ha kane ka thain ki dei ki trai ri trai muluk (Scheduled Tribes). Ka J.R.C. ka kynnoh ba ka jingai kam tang ia kumba 53 ngut ki briew kam lah ban pynhun ia ka jingjulor kaba khraw kaba ka thain kan mad hadien ha bud.
Ka jingdawa jong ka J.R.C.:
Ka Jaintia Revolutionary Council ka kyntu ia u District Magistrate bad ki bor ka Pollution Control Board kiba dei peit ia kane ka Public Hearing ba kin pynsangeh shwa ia kane ka Public Hearing ka ban long ha ka 13 tarik Lber, haduh ban da don ka jingwad bniah kaba thikna halor ka jingktah ia ka um bam um dih.
Ban pynmih paidbah ia ka plan ban pynneh pynsah ia ki mrad khlaw (Wildlife Conservation Plan) ha kane ka thain khnang ba u paidbah un ioh ban bishar bniah.
“Ngi lah phah ia kine ki jingpyrshah sha baroh ki tnad sorkar ba dei peit (District Magistrate, MSPCB, bad SEIAA) namar ngi kum ka jaitbynriew ngim lah ban ailad ia ka jingtih mawshun kaba lah ban pynduh ia ka hok jong ngi halor ka um bam um dih bad ka koit ka khiah,” la ong ka J.R.C. Central Body. KYRWOH President L.Suiam
