Shillong, Lber 10 : Ka Iingkashari Meghalaya High Court ha ka sngi Ba-ar, kala shim jingthoh ia ka jingkular ka Sorkar ba kan buh shuh shuh ia ki bor pahara ki ban ai jingiada ia ki kyrtong bar jylla kiba leit thep kyrteng ban iakhun ia ka elekshon Garo Hills Autonomous District Council.
Kane kala mih hadien ka jingsaphriang ki khubor ia ka jingkulmar bad ka jingsiat suloi ki Pulit kaba lam sha ka jingiap ki 3 ngut ki briew.
Haba pynmih ia ka hukum hadien ka jingbishar ia ka PIL bala mudui da u Bozlul Hoque, ka Division Bench ba kynthup ia ka Chief Justice Revati Mohite Dere bad Justice W Diengdoh kila pynpaw ba u Nongiasaid ain K Paul u khlem tynjuh than ia ka jingpynbna jong ka GHADC ba 17 tarik Rymphang naba ka don kawei pat ka mudui kaba dang sah hapoh ka Iingkashari Single Bench.
“Naba ym shym la tynjuh than ia ka clause (i), ngi kren shai ba ngi khlem khmih ia kaei kaba long ba man jong kane ka mudui bad namar kata, baroh ki jingiakren jong baroh ki liang mamla ka dang iai long kumba ka long haba iadei bad ka jingtynjuh ia ka impugned notification” ong ka Iingkashari.
Halor ka jingkyrpad ban bishar, u Paul ula pyntip ia ka IIngkashari ba ki don katto katne ki kyrtong bar jylla kiba la mad ia ka jingshah thombor ha ka por ba ki leit ban thep kyrteng.
U nongmudui ula kyrpad ban ai ka jingbthah ia ki bor Sorkar ba kin pynbiang ia ki bor pahara kiba khlain sha ki kyrtong bar jylla kiba wan ban thep kyrteng na ka bynta ka elekshon MDC lane ka jingbthah ban pynkylla ia ka jaka ban pdiang ia ki kot ki sla jong ki kyrtong hala ki jong ki Block.
U Paul ula pyntip ba kala don ka jingkulmar ha ka thain bad lah don ruh ka jingsiat suloi, ha kaba lai ngut ki briew kila iap bad bun kila mynsaw.
U Advocate General A Kumar ula jubab ba ka Sorkar kan pynthikna ban nym don kano kano ka jingjia ba sngewsih bad lada donkam, kan buh shuh shuh ia ki briew ban tehlakam iaka shongsuk shongsain. Ula kular ban sa shim ruh ia ka sienjam ha kabna pynthikna ba kan nym don shuh kano kano ka jingjia kaba kum kitei.
Ka Iingkashari kala pdiang ia ka jingkular bad buh ia kane ka kam ban bishar biang ha ka 17 tarik Lber.
