Shillong, Lber 10 : U Nongtrei mon sngewbha Cherian Momin ha ka sngi Ba-ar, ula thoh sha ka Sorkar Jylla ban pynkynriah shuwa ia ka por ban pynlong elekshon GHADC, haba kdew ia ka jingthut ka shongsuk shongsain ha ri-lum Garo.
Ha ka dorkhas sha u Commissioner & Secretary ba khmih ia ka Tnad District Council Affairs (DCA), u Momin ula ong ba ka jingpynbteng ia ki kam elekshon ka lah ban nang pynheh ia ka jingkynad na kaei kaba long ba man mynta bad kyntu ban phah kham bun ki bor pahara na Jylla bad ka Sorkar Pdeng, ban pynshai ia kaei kaba ka riti synshar ka kren halor ka jingtreikam ka Council, bad ban pynlong ia ka jingiakren iasuk hapdeng ki Jaidbynriew bapher bapher.
Ula kren ruh halor ka jingiap ki arngut ki briew ha Chibinang namar ka jingsiat ki Pulit, ka jingthang ia ki dukan ha iew Chibinang, ka jingthang ia ki kali ha Tura bad ka jingpynjari korphiw ka bor district bad jingkyrpad ia ki shipai ban iaid flag march da kaba ong “kine ki jingjia ki pynti shai b aka thain ka la mad ia ka jingbym don ka shongsuk shongsain kaba mih na ka jingiakynad jaidbynriew, ka jingpynjulor ia ki nongkynti, ka jingiap briew bad ki jingpyrrkhing. Ha kum kine ki khep, ka jingpynbteng ia ki kam elekshon ka lah ban nang pynheh ia ka jingiakynad bad buh ha ka jingma ia ka jingshngain u paidbah”.
U ong ba kane ka jinglong jingma ba mynta kala pynmih ruh ia ka jingkulmar jingmut bad jingiabatai kumar haba iadei bad ki kyndon ka Riti Synshar kiba kren ia ka jingtreikam jong ki Autonomous District Council (ADC) hapoh ka Sixth Schedule jong ka Riti Synshar ka Ri.
“Khnang ban pynbeit ia kine kiei kiei, la kyrpad sngewrit ia ka Tnad DCA ba kan ai ia ka jingpynshai kaba bniah halor ki kyndon treikam kiba kren ia ka elekshon GHADC bad ki jingiada kat kum ka riti synshar ka ri kiba iadeibad ka bor bad u pud u sam ka district council” ong u Momin.
