Shillong, Mar 9: Ka jinglah ban ïalehkai bha ka kynhun ka jylla Meghalaya, ka la pynlong ïa ka kynhun ban pynliem ïa ka Nagaland da 6 wiket ha ka jingïalehkai plate group jong ka BCCI U-23 Women’s One Day Trophy 2025-26 ha Chandigarh hynne ka sngi Nyngkong.
Ka Monica L Phawa ka la ïalehkai bad ialam ia ka kynhun kum ka kapten, da kaba rah ïa ka bat jong ka lyngba ka jingbeh thong ha ka por ba ka Meghalaya ka la poi sha ka thong kaba 146 ban jop ha ki 46 over. Ka Monica kam out haduh kaba kut da kaba tied 78 run na ki 132 bol, ka jingïalehkai kaba itynnad bha kaba kynthup ïa ki khyndai tylli ki saw run.
Shwa ia kane, ka Meghalaya ka la jop ia ka jingkynting pisa bad ka la jied ban kawang ball shwa bad ka la pynhap noh ia ki wicket ka Nagaland da 145 na ki 46 over. Ki khlur kiba khur wicket ki kynthup ia ka Cheanchi K Sangma (3/29), ka Blaridahun Dkhar (3/41), ka Indariakor Kharwanniang (2/24) bad ka Monica Singh (2/33).
Ka Nagaland ka la jop ïa baroh lai tylli ki jingïakhun hashuwa kane hynrei ka la liem noh ha ka jingïakhun pyrshah ïa ka Meghalaya mynta ka sngi.
Ka Meghalaya kala ialehkai bha haba sdang jong ka jingbehthong ha kaba Monica Phawa bad ka Ankita Sharma ki la tied 68 run kum ki nongtied nyngkong. Ka Ankita ka la ai ka bynta ban kyrshan hynrei ma ka lem bad lai ngut kiwei pat ki nongtied ki la shah out noh, kaba la pynlong ia ka Meghalaya ban ioh 107/4 bad ai jingkyrmen ia ka Nagaland.
Hynrei, ka Monica Phawa ka la bteng ban ialehkai bha bad ka la ïoh ia ka jingkyrshan na ka Janika Marak haduh kaba kut bad, ryngkat lang, ki la lah ban kamai ïa ki run kiba dang sah bad pynsah sa 4 over.
Ka Meghalaya ka la sdang suki bha ïa kane ka lympung, ha kaba ka la shah rem ha ka Manipur da 5 wiket bad ka Sikkim da 88 run.
Ha ka sngi saitjaiñ, ka Meghalaya ka la ïoh ïa ka jingsngew skhem hadien ba ka la pynliem ïa ka Arunachal Pradesh da 8 wiket. Ha katei ka jingiakhun ka Arunachal ka la jop ia ka jingkynting pisa bad ka la tied nyngkong hynrei ka la shah pyn out lut baroh tang 79 run.
