Shillong, Lber 07: Ka Hynniewtrep Youths’ Council (HYC) ka ai khublei kyrpang ïa ki ophisar bad ki Pulit ka Anti-Narcotics Task Force (ANTF) halor ka jingïoh kurup drok ba shongdor palat T.51 klur.
Ka HYC ka sngewkmen ban iohi ba kane ka jingïoh kurup kaba heh ka phah ïa ka khubor kaba shai sha baroh kiba don bynta ha kane ka kam beain ba ki Pulit kim shongthait bad ki trei shitom ban pynduh jait ia u drok hapoh ka Jylla.
“Hynrei, ka HYC ka kyrpad jur ïa ki bor ba dei khmih ba kim dei ban kut tang ha ka jingkem ïa ki nongrah ne ki nongpynïaid drok barit kiba don bynta ha kane ka kam. Watla kine ki jingkem ki long kiba donkam, hynrei ka jingïakhun pyrshah ïa u drok kan long kaba jop shisha tang lada ki ioh kem iaki nongpyniaid, ki nongbei pisa bad ki briew kiba don shadien jong kine ki nongkhaii drok” la ong u President ka HYC u Bah Roy Kupar Synrem.
Ka HYC ka ngeit ba ka kam khaii drok ha kane ka thaiñ ka long kaba la pynbeit bha bad don ki briew kiba don bor kiba don bynta sha lyndet hynrei ki pyndonkam ïa ki briew kiwei pat join ki nongrah bad nongdie drok hapoh ka Jylla.
“Kumta ka jingtohkit ka dei ban ïaid shakhmat ha ka rukom kaba bniah, kaba tbit bad kaba khlem map ban pynpra noh ïa ka jingiadonkti (network) naduh tynrai haduh ban rat diengkhong ia u drok hapoh ka Jylla.
“Ka jingïoh kurup ïa ki drok ka long ka jingjop kaba khraw, hynrei ka jingjop kaba shisha kan wan tang ynda ki nongpynïaid ba heh kiba ïalam ïa kane ka kam na shadien kin shah wanrah bad pynshitom hakhmat ka aiñ.” u la ong.
 ka ai khublei kyrpang ïa ki ophisar bad ki Pulit ka Anti-Narcotics Task Force (ANTF) halor ka jingïoh kurup drok ba shongdor palat T.51 klur.){kind=link}