Shillong, Lber 7: U Lat ka Jylla u CH Vijayashankar ula pynkup burom ia ki 5 ngut ki nongialehkai jongka All Meghalaya Kickboxing Association hynne ka sngi saitjain, halor ka jingioh khur ia ki takma ha ka Asia Pacific Open Kickboxing Championship bad ong ba kane ka jingjop ka jongki kan ai mynsiem ia ki samla ka jylla.
Hapoh ka Lok Bhavan, u Lat ula ai khublei ia ka Amegrace Nongbsap bad Ozanica Nongbsap kiba la ioh khur ia ka takma ksiar, ka Banshailin Grace Masharing bad Mewanpyndap Marpan kiba la ioh ia ka takma rupa bad Blaiona Kharmujai ba la ioh ia ka takma rnong.
U lat ula ong, ba kane ka kynhun kala wanrah nam bad jingsngew sarong ia ka Meghalaya ha ka rynsan International bad iaroh ia ka jingaiti, ka jinglong ryntih bad ka jingtrei shitom”.
Ula bynrap ba “Kum kane ka jingjop ka ai mynsiem ia ki samla ka jylla ban shimkhia thikna bad da ka jingkitkhlieh ia ka kam ialehkai” bad ka banjur ba ka kam ialehkai, “Ka don ia ka bynta kaba khraw ban tei ia ka jinglong, bad iengskhem ha ka nongrim bad ban kyntiew ban ioh ia ka met kaba koit ka khiah”.
Ula ai jingiaroh ia ka Association bad ia u Coach Samuel Hashah ha kaban saindur ia ki sap ki phong bad pynpaw ia ka jingkyrmen ba ki nongialehkai kin iai kynjoh shuh shuh ha ka thong.
Ki nongialehkai kila ai khublei ia u Lat halor ka jingai jingithuh bad ka pynpaw ba kin bteng ban trei shitom ha kaban wanrah nam bad burom ia ka jylla Meghalaya bad ia ka ri India.
