Shillong, Lber 03 : U Nongialam ka BJP bad MLA ka Pynthorumkhrah Bah AL Hek ha ka sngi Ba-ar, ula ong ba kano kano ka rai ban iakhun ia ka elekshon shiteng samoi na Shillong Lok Sabha seat kan shong eh ha ki Nongialam na Delhi, bad ka State Unit kan “leh ia kat kaba bthah ki nongialam”.
“Kin sa pyntip sha ngi halor kane ka elekshon shiteng samoi” ong u Bah Hek sha ki nongthoh khubor haba kylli la ka BJP Meghalaya kan tynruh ia ka Delhi ban mih iakhun ha kane ka elekshon.
Ula pynthikna ba ki jingiakren hapoh ka party kila iaid
“Na ka party hi ngi la iakren la ngin sei kyrtong ne em na ka bynta ka elekshon MP shiteng samoi na Shillong. Ngi don bun ki kyrtong hynrei ngim pat shim rai la ngin iakhun ne em” ula ong haba pyntip ba u President ka BJP Meghalaya un s alum shen ia ka jingialang halor kane.
U Bah Hek u pyntip ba shen ka party kan sa iashong jingialang. “Ngi la pyntip sha u President ka BJP Meghalaya ba un khot ia ka jingialang ha kaban iakren ia kane ka elekshon shiteng samoi”.
Haba kylli ban kyrshan ia ka NPP, u Bah Hek ula kyntait ba kan don ka jingkyrshan ia kiwei pat ki party bad ong “Lada ngi dep ban iakhun ngi don la u jong u kyrtong. Ngin ym kyrshan satia ia kiwei pat ki kyrtong( jong kiwei ki seng sain pyrthei)”.
“Ngin iaid kat kaba bthah ki Nongialam na Delhi hynrei ka BJP Meghalaya ka kwah ban mih iakhun hi la ka jong” ula bynrap.
