Shillong, Lber 02 : U Myntri ka Sorkar Pdeng ba khmih ia ka Social Justice and Empowerment Dr Virender Kumar ha ka sngi Nyngkong, ula ong ba ka Sorkar Pdeng ka dang iakren pynbeit bad ka Meghalaya ban pynduna ia ki jingeh kiba ktah ia ka jingai skhim namar ka Aadhaar ha kane ka Jylla.
Haba kren sha ki lad pathai khubor hadien ba pyniaid ia ka jingialang bishar kam ha Tara Ghar, u Myntri ula ong ba ka jingpyniasoh ia u Aadhaar ka dei kaba iaid ha ka ri baroh kawei, hynrei “Ki jingjynjar lane jingeh” kila paw ha ki bynta jong ka Meghalaya.
“Ngi la iakren bad ka Tnad kumno ban pynbeit ia kane….khnang ba ka jingpyntreikam kan iaid beit iaid ryntih ha ka por bala buh” ula ong haba bynrap ba ki skhim ba pyntrei hapoh ka Ri baroh kawei, ki dei kiba la pynwan dur ban long kumjuh ia baroh bad ia ki jingeh ba mih ha ki Jylla la shimkhia ban iakren na ka bynta ban pynbeit iaki.
Ki Ophisar kila pyntp ha ka jingialang ba ka jingpynrung kyrteng Aadhaar ha Meghalaya ka duna ban ia ka National Average namar ki don katto katne ki briew kila kyntait ban pynrung kyrteng bad don ruh ki bym shym la pynthymmai ia ki jingtip namar ki OTP ki leit sha ki SIM card ki bym don ne jah.
U Nongaibuit Bah Paul Lyngdoh, ka Deputy Commissioner Kong RM Kurbah bad ki Heh Ophisar ka Tnad kila iashimbynta ha kane ka jingialang.
U Kumar ula pyntip ba ki jingai jingbatai kila long ruh halor ka PMAY, PMGSY bad kiwei ki prokram ha East Khasi Hills bad ia ka jingleit jurip jong u sha ki skul, ki jaka sumar khynnah bad ki jaka sumar tynmen.
Kane ka jingwan jong u Dr Virender ka dei shibynta na ka jingwan bishar kam ki Myntri ka Sorkar Pdeng ba ju leh man ka por ha ka thain Shatei Lam Mihngi.
