Shu ieh iengjah ka Health Dept ia ka Langpih Sub Centre
Nongpoh, Lber 01 : Ka Federation of Khasi Jaintia & Garo People (FKJGP)-Rimuliang Circle, kala kynthoh tyngeh ba ka Sorkar Jylla ka pynbor dalade ia ki paidbah ba kin iakhih bad wan tur sha Secretariat namar ka jingkynnoh lehkmie nah ia ki thain nongkyndong.
Kane ka jingkynthoh kala mih hadien ka jingwan jurip ia ka Langpih Health Sub-Centre, kaba la shu ieh iingjah da ka Tnad ka Koit ka Khiah naduh ba dep tei ia ka building ha u snem 2022.
Ha ka jingjurip, ka Seng kala lap ba kane ka jingtei ka Tnad ka Koit ka Khiah kala sop da ka sanium ha baroh sawdong bad ka daw ka dei namar ka jingieh iingjah bad bym don nong sumar khlem da iakren ia ka jingdon ki nongtrei ne doktor ki ban ai jingshakri ia ki paid nongpang ka thain.
U President ka Seng, Bah Serbilin Lyngdoh ula pynpaw “Kum ka seng ngi dap da ka jingsngewsih ban iohi ia ka jingieh bein ka Sorkar ia ka thain, ka jingieh iingjah ia kane ka jaka sumar kaba donkam tam ha ka thain”.
Une u Nongialam ka Seng ula dawa ia ka Sorkar ba kan thung noh ia ki nongtrei bad ki doktor ha kane ka jaka sumar khnang ba kin ai jingshakri ia ki paidbah ka thain, khamtam ka Langpih ka dei kawei na ki jaka kab jur bha ka jingpang khieshoh rih, typhoid bad kiwei kiwei”.
“Ka jingdawa Health Sub Centre ha thain Langpih ka dei ka mat kaba la iaid lynti la bun bun snem….ngi sngewkmen ba ka Sorkar kala mynjur bad kala wanrah ia ka Sub Centre ha Langpoh. Hynrei ngim lah pat ban pdiang ba ka Tnad ba dei khmih kan shu wan buh kai ia kane ka jingtei khlem da pyndonkam kumba la thmu” ula ong.
U Bah Serbilin ula kyntu ia u Myntri ka Koit ka Khiah Bah Wailadmiki Shylla ba un tuklar lem ia kane ka kam bad ban pynthikna ba ka Tnad kan plie bad thung noh ia ki nongtrei kynthup ki doktor bad ki nos ba kin wan ai jingshakri ia ki paidbah ka thain.
“Na ka por sha ka por ngi ju thoh sha ka Ophis u District Medical & Health Officer (DM&HO) ba dawa pyntreikam noh ia kane ka Health Centre hynrei ym shym la poi shano shano ruh. Kane ka pyni ia ka jingbym khein snep ia ngi bad ka pynbor ba ngin shim da ka lynti jong ki jingiakhih” ula ong.
“Hato ka Sorkar ka kwah ba ki paidbah kin leit pynklumar shwa ha Secretariat na ka bynta ban ïoh ïa ki jingdawa jong ki ?. Ngi dawa jur ba ka sorkar kan pyntreikam bad buh noh ïa ki nongtrei hapoh ka Health Centre ha Langpih”, ong u Bah Serbilin Lyngdoh President FKJGP Ri Muliang.
-Rimuliang Circle, kala kynthoh tyngeh ba ka Sorkar Jylla ka pynbor dalade ia ki paidbah ba kin iakhih bad wan tur sha Secretariat namar ka jingkynnoh lehkmie nah ia ki thain nongkyndong.){kind=link}