Shillong Rymphang 28: U Symbud Myntri Rangbah ka Jylla uba khmih ia ka kam Pohiing Bah Prestone Tynsong ula iaroh ia ka Meghalaya Police K 9 Unit kum u paia uba khlain ha kaban iada na ki jingma, ha ka jingialang pdiang sngewbha bad ka jingshongthait na ka kam jong ki ksew pulit, kaba la long hynne ka sngi Saitjain.
U Bah Tynsong ula ong, ba kane ka kynhun kala nang kiew shaphrang na ka jingdon 7 tylli ki ksew pulit sha ka jingdon mynta 37 tylli ki ksew pulit kiba kynthup ia ki 10 kiban buddien ia ki nongleh kam sniew, 14 tylli kiban pyndonkam ha kaban lap ia ka jingbuhrieh ia ki droks, 11 tylli kiban wad ia ki tiar pynbthei bad ar tylli ki ksew iakhun ne Assault Dogs lyngba ka DREAM Mission.
“Ka jingroi kadei ka jingdonkam bad kam dei satia ka jingdon jingem kaba remdor” ula ong.
U Bah Tynsong ula pynpaw ruh ia ki kam kiba la seisoh, ha kaba ki ksew pulit kila lah ban lap ia ki tiar pynbthei ha East, South bad West Garo Hills, ka jingioh kurup ia u droks Heroin uba shongdor T.5 Klur uba la ioh kurup na Ri Bhoi ha u snem 2023 bad ka jingioh kurup 691.54 gram na Shillong mynta ka snem.
“Man la ki jinglap kadei kaba la lah ban pynlait na ki jingjia kiba sngewsih” ula bynrap.
Ha kaba iadei bad ki Handlers ne ki nongkhmih ne nonghikai ia ki ksew pulit, ula ong, “Phim shu ia iaidlang, phi im bad ring mynsiem lang ha ka mishon” bad ula pynpaw ba ka sorkar ka iengskhem ha kaban iai bteng ban ai iaki jinghikai kiba kyrpang bad na ka bynta ka bha ka miat jong ki ksew pulit.
“Na ka bynta ki ksew kiba shongthait na ka kam, nga ai ka jingkhublei ia ka jingai jingshakri ka jongki. Na ka bynta kito kiba dang rung thymmai ha ka kam, phi don ia ki kjat kiba heh ban pyndap ia ka jaka kaba thylli” ula pynkut.
Haba iakren bad ka Director General of Police (DGP) ka Kong Idashisha Nongrang kala ong, ba ki don 3 tylli ki ksew pulit kiba la shongthait na ka kam hadien ba kila ai ia ka jingshakri kaba la palat ia ka 30 snem, u ksew Belgian Malinoi uba la tbit ha kaban buddien ia kiba leh kam sniew bad 2 tylli ki ksew Labrador kiba la ioh jinghikai ha kaban wad ia ki tiar pynbthei bad ia ki droks.
Kila don 24 tylli ki ksew kiba la pynrung kam thymmai, 6 tylli kila dep ban rung ha ka kam na ka DREAM Mission.
“Ngi mynta ngi don 11 tylli ki ksew kiba la ai jinghikai ban wad ia ki tiar pynbthei bad khyndiat ruh na ka bynta ban wad ia ki jingdih kiba be-ain” ong ka Kong Nongrang bad ka bynrap, “Mynshwa ngi ju don ia ka K 9 tang hapoh Shillong, hynrei mynta ngi lah phiah ia ki ha kylleng ki bynta jong ka jylla”.
Kala batai ia ka jingjied ia u ksew Belgian Malinois namar ba u im slem bad ka jingsuk ban pyniadei bad bun ngut ki nonghikai ne Handlers, ym kum ki ksew German Shepherds.
Kala ong, ba ki Handlers kila ioh jinghikai ha Bangalore bad kila don lypa ia ka jingiadei bad ki ksew naduh katei ka por bad man la ki district unit kin don ia ki ksew kiban wad ia ki tiar pynbthei, jingdih be-ain bad kiban buddien ia kiba donkti ha ki kam sniew, katba ki ksew iakhun ne Assault Dogs kin sah ha ki ATS.
