Shillong Rymphang 28: Ka Comptroller and Auditor General of India (CAG) kala pynpaw ia ka jingsngewkhia halor ka jingpyntreikam ia ka Labour Welfare Schemes ha Meghalaya, da kaba pynpaw ba kala don ka jingsiew palat pud bad ka jingpynduh jingmyntoi ia ki nongioh jingmyntoi kiba dei hok.
Ka kaiphod jong ka Social and Economic Sectors and Urban Local Bodies kaba kut ha ka 31 tarik u Lber 2023, kaba la wanrah da u Myntri Rangbah ka jylla u Conrad K Sangma ha ka ïingdorbar thawaiñ ha ka sngi Thohdieng, kala pyni ba kala don ka jingphah kaba bunsien sha ki nongioh jingmyntoi da kajuh ka kyrteng, kaba kynthup ia ki 4 sien ki jingphah pisa ha ki 15 tylli ki jingjia, 3 sien ka jingphah pisa ha ki 60 tylli ki jingjia bad 2 sien ki jingphah ha ki 381 tylli ki jingjia.
Nalor kane, ka CAG kala lap ba 156 ngut ki nongioh jingmyntoi kila duh ia ka T.4.68 lak ha kaban ioh jingmyntoi na ka jingpunkhun ka jong ki, watla kila ioh ia ka jingmynjur ban ioh ia katei ka scheme.
“Ka jingai jingiarap ia ki longkmie kiba punkhun ka long sha ki 147 ngut kaba ka jinglut jingsep kala kot T.4.41 lak la phah ia ka pisa lyngba ki Bank Account ki jongki” la pynpaw ha ka kaiphod.
Ka Tnad Labour kam shim la ai ia kano kano ka daw halor ka jingbym phah ia ka pisa sha kiba dei hok ban ioh ia ka jingmyntoi.
Ka CAG kala pynpaw ruh ba 64 ngut kiba dei ban ioh jingmyntoi kila duh ia ka T.1.28 Klur ha ka jingioh jingmyntoi halor ka jingiap, watla ka Board kala pyllait ia katei ka pisa.
“Ka Board kala pynpaw ba 64 ngut ki nongioh jingmyntoi kim shim la don ia ki kot ki sla kiba biang bad ka jingkam kadei kaba hap ban khmih biang hadien ba la ioh pdiang ia ki kot ki sla kiba donkam” la pynpaw ka kaiphod.
Ka CAG kala lap ruh ba ka jingai khusnam da ka pisa ia ki khynnah kiba wan shakhmat ha ki jingpule kam dei kaba lah pyntreikam thikna bha, ha kaba ym shim la don satia na ki 12 ngut kiba lah aplai ban ioh pdiang ia ki jingiarap namar ka jingbym shai ki kyndon treikam.
“Ka Welfare Board kam shym la pynsaphriang ia ki kyndon treikam kiba biang ha kaba iadei bad ka jinglah jong kito kiba aplai. Kam shim la don kino kino ki kam ki jam jongka IEC kiba la pynlong ia ki nongbylla kiba la register ban ioh ia ki jingtip shaphang katei ka scheme” la pynpaw ha ka kaiphod.
Ka Tnad Labour kam shim la ai jingpynshai ia ki jingpan jingpynshai jong ka CAG, kaba la pynmih ia ka jingsngewkhia halor ka jingpyntreikam ia ka Labour Welfare Schemes ha ka jylla.
 kala pynpaw ia ka jingsngewkhia halor ka jingpyntreikam ia ka Labour Welfare Schemes ha Meghalaya, da kaba pynpaw ba kala don ka jingsiew palat pud bad ka jingpynduh jingmyntoi ia ki nongioh jingmyntoi kiba dei hok.){kind=link}