Shillong, Rymphang 26: U Symbud Myntri Rangbah ka Jylla Bah Prestone Tynsong ula pyntip ha iingdorbar ha ka sngi Palei, ba ka Tnad Pule kala treikam tang 2823 ngut ki pulit pyrshah ia ka jingdonkam bala mang kata 3,486 ngut bad 650 tylli ki kam kila lait thylli ha kylleng ki shnad treikam.
Haba jubab ha ka iingdorbar, u Bah Tynsong ula ong, ki police station ki don 1,431 ngut ki pulit na ka 1,843 tylli ki post kiba la mang, ha Outpost ki don 380 ngut na ka 503 ngut, ha ka Traffic Branch ki don 368 ngut na ka 439 ngut, ki CID ki don 107 ngut na ka 121 ngut bad ka Special Branch ka don 546 ngut na ka 580 ngut.
Ula pynshai, ba ha Police Reserves, la shim haduh 859 ngut ki pulit na ka District Executive Force kumba ki donkam, ha kaba, kam shim la don kano kano ka jingmang kat kum ka jingdonkam.
U MLA ka UDP na Mawsynram u Bah Olan Sing Suin ula kylli kumno ka sorkar ka pyrkhat na ka bynta ban pyndap ia kitei ki kam kiba thylli. U Bah Tynsong ula jubab da kaba ong, “Ia kane baroh yn sa shimkhia ha ka jingpynmih ia ka jingpynbna ne Advertisement kaba thymmai.”
U MLA ka VPP u Bah Brightstarwell Marbaniang ula pynpaw ia ka jingsngewkhia halor ka Meghalaya Police-Public Ratio, da kaba kdew ba ka Bureau of Police Research data kala buh ia ka jylla ba ka don 455 ngut ki pulit na ka bynta shi lak ngut ka jingdon paid, haba ianujor bad ka Nagaland kaba don 1,136 ngut ne ka Mizoram kaba don 568 ngut.
U Bah Tynsong ula pynphai nia da kaba ong, ba ka ratio ba mynta jong ka Meghalaya ka long 197.65 bad kala lah ban pyndep ia ki kyndon jong ka BPR&D.
“Haba ngi rai ban thaw ia ki police station kiba thymmai, ngi da khmih bniah bha ba kan iaid ryngkat bad ka jingthaw ia ki post” ula ong.
Halor ka jingkynnoh ba ki pulit kim shym la trei ia ka kam ka jongki, u Bah Marbaniang ula ujor ba ki pulit Langrut ne Constable kila shah pynngat kam ban trei ia ki kam iing kam sem ha ki jaka sah jongki ophisar.
U Bah Tynsong ula kubur ia kane ka mat bad ong “Lada don kino kino kiba pyndonkam bakla ia ka bor na ka jingtrei ia ka kam pulit sha ki kam kiba bym dei ki kam pulit ban trei, ngan sa khmih bniah bad pynthikna ba kum kitei ki jingjia kim dei ban jia”.
Hadien ba u Bah Marbaniang ula shimkhia bad iai ban ia kane ka mat, u Symbud Myntri Rangbah ula ong, “ngan sa shimkhia”.
U MLA ka NPP u Dr Celestine Lyngdoh ula kyntu ban buh ia ka Traffic Branch na ka bynta ka Umsning, da kaba pynpaw ba kala don ka jingdheng kali ha ka surok kaba 600-metre. U Bah Tynsong ula ong, ba ia kane ka mat yn sa khmih bniah thikna bad ka bynrap ba la buh ia ki pulit Home Guards ha ki jaka kiba donkam bha kum ka sienjam kaba shipor.
Ha kaba iadei bad kawei pat ka jingkylli, ula pynthikna ba ka Mawkroh Police Outpost kadei kaba la treikam bha.
