Shillong, Rymphang 24 : Ka Kynhun Myntri ka Sorkar Jylla kala ai jingmynjur ia ka Indian Institute of Public Health Shillong (IIPHS) Bill 2026, kaba plie lynti ia kane ka jaka pule ba kan ioh jingithuh kum ka kyrdan University.
Haba pynbna ia kane hadien ka jingialang bala pyniaid da u Myntri Rangbah Conrad K Sangma ha ka sngi Ba-ar, u Myntri ka Koit ka Khiah Bah Wailadmiki Shylla ula ong “Kane kan long kum ka jaka pule ba kongsan na ka bynta ka thain Shatei Lam Mihngi, ka lah ban sei ia ki nongtrei ka koit ka khiah ym tang ha Jylla hynrei ha ka thain Shatei Lam Mihngi baroh kawei”.
Ka IIPHS, ka Public Health Institution ba marwei ha ka thain, kan lah ban ai degree sha ki public health scholar ha ka kyrdan University.
U Myntri ula pynpaw ia ka synniang jong ka IIPHS ha ka kam wad bniah, ai jinghikai bad ki jingiarap bala pynshong nongrim na ki jingkhein, haba kdew ia ki kam jong ha ka jingai jinghikai ha ka Cardiopulmonary Resuscitation (CPR), ka jingartatien ban ai injek bad kiwei kiwei.
U bah Wailad ula pyntip ba ka University kan treikam daka jingkyrshan nalade ialade bad kan kyrshan ia ka Sorkar Jylla ha kaban pynmih ia ki nongtrei kiba lah ban trei ia ki kam haba mih ki khep ba kyrkieh kum ka COVID-19.
Kane ka sienjam ka dei kaba la leh halor ka jingiohi ia ka jingdonkam ki jaka pule ba pynleit jingmut ha ki kam wahbniah, khamtam hadien ka jingkhlad noh u MP Dr Ricky AJ Syngkon.
“Ngi donkam ia ki briew kiba leh research….ha ki khlam bad kiwei ki jingpang” bynrap u Bah Wailad.
Ha kajuh ka por, ka Kynhun Myntri kala ai jingmynjur ruh ia ki katto katne ki project ba kongsan bad ki jingpynkylla ia ki policy, kynthup ka jingpynjlan ia ka jingaiwai ba 30 snem ia ka Orange Root Restaurant ha Sohra bad ka policy kyntiew kyrdan ia ki nongtrei Anganwadi.
U Bah Wailad ula pynbna ruh ia ki jingmynjur, kiba kynthup ia ka jingpynwan dur thymmai ia ka rukom siew bai wai ha ka dur jong ka PPP model na ka bynta ka Orange Root bad NoC ban shna pynheh bad pynbha ia ki jingtei ha ka Eco Resort Nongkhlaw.
Ka Kynhun Myntri kala ai jingmynjur ruh ia ka Meghalaya State Policy for Promotion of Anganwadi Workers sha ki Supervisor.
Hynrei u Myntri u khlem ai pat ia ki jingtip ba bniah halor ki jingmyntoi bad ka por ban pyntreikam ia kane ka policy.
 Bill 2026, kaba plie lynti ia kane ka jaka pule ba kan ioh jingithuh kum ka kyrdan University.){kind=link}