Shillong, Rymphang 24: U Myntri kam jngohkai Timothy D Shira ha ka sngi Ba-ar, ula pyntip ba ka Sorkar kala kynshew pisa haduh T.31 klur ha Mairang Constituency naduh u snem 2017, kaba la ai bun ki jingmyntoi ia ki trai shnong.
Ha ka jubab bala wanrah ha Iingdorbar, u Shira ula ong ba ki jingmyntoi ki kynthup ia ka jingpynmih pisa, ka jinglah aikam aijam, ka jingkiew ka kamai ki trai shnong ba treikam khaii bad kyrshan ia ka kamai jakpoh ki jaka nongkyndong.
U Myntri ula pyntip ia ki jingtei kiba la pyntrei ha ki skhim bapher bapher ba kynthup ia ki jingtei harud ki wad, zipline, eco-resort, cable suspension bridge nalor kiwei kiwei.
Halor ka jingpoi ki nongshangkai, u Shira u iathuh ba haduh 28,503 ngut ki nongshangkai kynthup ia 28,487 kiba na ri bad 16 kiba nabar ri, kila leit kai sha Mairang ha kine ki saw snem naduh u 2022 haduh 2025.
