Shillong Rymphang 23: Ka Nongthoh khubor ka Jylla ka Kong Aihun K Lyngdoh Tron, ha ka Sngi Saitjaiñ, kala ioh ia ka khusnam “Best Journalist of Meghalaya” ha ka 20TH Media Excellence Award 2026 kaba la pynlong da ka Media Federation of India ha PLB Auditorium, ITO, ha New Delhi.
Ia kane ka jingsam khusnam sha ki nongthoh bad nongpathai khubor, la sam da u Director General barim jong ka Indian Institute of Mass Communication (IIMC) u Prof. Sanjay Dwivedi, ha ryngkat ka jingdonlang u Senior Journalist u Prateek Trivedi bad u Deputy Director General jong ka National Informatics Centre (NIC) u Dr. LP Sharma.
Ka Kong Aihun kadei ka nongthoh khubor jong u Mawphor bad kala ioh ia kane ka khusnam halor ka jinglah ka jongka ban noh synniang ha ka kam thoh khubor bad khamtam ban pynsaphriang ia ki jingtip bad ia ki khubor ki bapher bapher sha ki paitbah jong ka jylla Meghalaya ha kine ki 11 snem jong ka jingshakri ka jongka.
Ha kane ka jingialang la iadonlang ruh u National President jong ka Media Federation of India u Arun Sharma, ki nongkitkam jong ka MFI bad ki nongthoh bad ki nongpathai khubor kiba la wan na kylleng ki jylla jong ka ri India.
Ka thong jong ka MFI ban sam ia ki khusnam ka long ban ai jingithuh ia ki nongthoh khubor kiba na kylleng ki jylla jong ka ri India kiba la trei met bad mynsiem ha ka kam thoh bad kam pathai khubor.
