Shillong Rymphang 23: U Myntri kam jngohkai ka jylla Timothy D Shira ha ka sngi Nyngkong, ula pyntip ha iingdorbar ia ka jingleh Assesment bad Survey ia ka jingtuid ki nongjngohkai sha ki jaka jngohkai, ka jingwan ki nongjngohkai na kylleng, ka jingpynlut, ka jingkhring, ka por kaba ki pynlut ryngkat bad ia ki jingtip ia ka jinglong jingman kum ki jaka, tiket, ka jingsiew pisa lyngba ka Digital Payment, jaka pynieng kali bad ka jingleh khuid.
Ia ki shnong kiba don ki jaka jngohkai la kynthup ia ki ha ka kynhun Cluster kiba don ia ka jinglah ban btin ban kyntiew ia ka jingroi ki Homestay.
“Ka Survey kala pyni kumno ba ka jingdon ia ka mariang bad ia ki kolshor kiba bun jait, ki Kshaid, ki Krem, ki Park, ki riat ki ram, ki pung um, ki jaka iaid kjat bad ki Law Kyntang kila pynwandur ia ka kam jngohkai” ong u Shira bad ka pynpaw ba ka Sohra, Mawsynram bad Dawki kila wan ha ka kyrdan kaba hakhmat eh ryngkat bad ki projek kiba thymmai bad ka jingplie ia ki jaka kiba thymmai kidei kiba la bynrap lang katkum ka jingmih ka jingdawa.
U Myntri Rangbah u Conrad K Sangma ula ong, na ki 877 tylli ki Homestay kiba la dep ban bhah, kila don 843 ngut kiba ioh jingmyntoi kiba la ai ia ka jingsiew.
“Ka jingiakren kala iaid ha baroh ki kyrdan, ki Rangbah Shnong la kynthup lang hashwa ban shim ia kano kano ka rai kaba khatduh” ula ong bad ka pynpaw ia ka jingtreikam kaba ioh jingmynjur ha ki 3 bynta naduh na ka Directorate shaduh ka jingbhah ia ki Committee.
Halor ki bym lah ban treikam, ula ong, “Ngim pat peit ia kane ka bynta kumba long ia mynta hi, namar ba ka jingthmu ka long ban kyntiew bad ban kyrshan”.
U Sangma ula ong, ba ia kane ka Scheme mynta khlem pyniasoh shuh bad ka PMEGP ban pynsuk ia ka rukom bhah ia ka pisa kan long kaba iaid ryntih hadien ba kala mih ka jingeh ha ka jingiadei bad ki bynta jongka kam bad ka Bank bad ka sorkar kan iarap ia kito kiba lah sahkut hapoh jong katei ka lynti iaid.
U Timothy D Shira ula ong, ba man la uwei pa uwei u nongioh jingmyntoi u ioh T.10 Lak ha kaba ia ka T.7 Lak la siew da ka sorkar bad kaba sah la siew da kiba ioh jingmyntoi.
Haba pynshai halor ka District Coverage bad Cluster Data, u Sangma ula ong ba ka jingleh Survey kadei ha ka lynti kaba iar bha bad kaba la iatreilang ha baroh ki kyrdan bad ki shnong kiba la shah jied ha ka Cluster na ka bynta ban pyntreikam.
