Guwahati, Rymphang 20: U Myntri kam Pohiing ka Ri Amit Shah ha ka sngi Thohdieng u la pynbna ia ki jingthmu ban pynlong ia ka Assam kaba lait na ka jingshlei um bad ban weng ia ka jingeh na ka jingwan rung tuh beain ki mynder ri lada ailad ia ka BJP ba kan wan ha ka bor synshar ha kine ki san snem ban wan.
U Shah u la ong ia kane haba plie ia ka Vibrant Village Programme ha ka shnong Nathanpur kaba don ha Barak Valley jong ka jylla Assam.
“Mynta ka sngi ngi la sdang ia ka Vibrant Village Programme-II, bad lyngba kane, ngin wanrah ia ka roi ka par sha ki shnong bad ki jingdon jingem kiba don ha khappud kumba long ha kiwei pat ki jaka ha kylleng ka ri.Kane ka la long kaba lah namar u Myntri Rangbahduh ka ri u Narendra Modi,” la ong u Shah.
U Shah u la kren shaphang kumno ka jingthmu jong ka Vibrant Village Programme kan wanrah ïa ka roi ka par sha ki shnong ba marjan, kaba pyni ïa ka jingkiew bad jingroi kaba la ïohi ha kano kano ka bynta jong ka ri.
“Kumta, kane ka shnong Natanpur ruh kan sa long kawei na ki shnong ba nyngkong eh jong ka ri India, ym namar ba ka don hajan khappud, hynrei namar ba kan sa long kaba nyngkong ha ka pule puthi, ka jingpynmih ban ai kam ai jam, ka surok bad ka jingpyniadei, ka bording—ka ba long ka nombar ba nyngkong eh ha kiei kiei baroh,” la ong u Shah.
U Shah u a kynthoh ba ka sorkar pdeng kan pynlut haduh T.6, 900 klur hapoh ka Vibrant Village Programme-II na ka bynta ban pynroi ia kumba 334 tylli ki Block, bad 1, 954 tylli ki shnong ha ki 17 tylli ki jylla jong ka ri. Na kine, 9 tylli ki district, 26 tylli ki block bad 140 tylli ki shnong ki ba don ha Assam.
U la ong ba baroh ki jingdonkam ha kine ki 140 tylli ki shnong kin long ha kajuh ka kyrdan bad kiba don ha kano kano ka shnong ha ri India.
“Ka la don ka por ba ki shnong ha khappud la khot ki shnong ba khatduh bad ki duna shibun ki jingdonkam hynrei u PM Narendra Modi u la rai ba baroh ki shnong ha khappud kin long ki shnong ba nyngkong bad mynta kine ki shnong ha khappud kin long kiba nyngkong ha ka surok, ka jingkhuid ha ka umbam umdih, ki jingpyniadei, ka kam ka jam, ka pule puthi bad kiwei kiwei ki kam.Ki 140 tylli ki shnong khappud ha Asama kaba don ha khappud bad ka Bangladesh yn pynlong kum ki shnong ba khlain bor,” u la ong.
