Shillong, Rymphang 20 : Ka Chief Adviser ka Sorkar MDA bad MLA ka NPP na East Shillong Kong Ampareen Lyngdoh kala pynpaw ia ka jingsngewsih bad ai burom halor ka jingkhlad kyndit u MP ka Shillong Dr Ricky AJ Syngkon, haba kyntu ia ki riew sain pyrthei ba kin bud ia ka nuksa jong u.
“Lada dei ia ngi ban burom ha ka jingkynmaw ia u, ai ba ka sain pyrthei kan ym long ka rynsan ka jingpyniashun hynrei jong ka jingia ai jingmut bad ka jingshakri. Ki jingiapher kin don beit, hynrei ym ban taplup ia ki jingkitkhlieh ba ngi iadon baroh” ong ka kong Ampareen haba iashimbynta ha ka jingiakren ai burom khatduh ia une u Nongialam ba khlad noh.
“Ngi ieng mynta ban kynmaw burom ia u (L) Dr Ricky. Ka jingkhlad ba khlem pat dei por jong u, kala wanrah ia ka jing sngewsih ym tang ia kane ka Iingdorbar hynrei ia ki paidbah ka Jylla, kiba ngi baroh ngi shakri”.
Ka kong Ampareen kala pynpaw ruh ia ka jingaiti lut jong u Dr Syngkon ha ka jingshakri bad ong ‘Watla u Dr Syngkon bad ma nga, ngi dei na ki liang ba iapher, ka khyllip kum kane ka pynkynmaw ia ngi ba shabar ki jingiasngewpher jong ngi, ngi don pat ia kajuh ka jingthmu…..ha u 2024, u Dr Ricky bad ma nga ngi la ieng mar pyrshah, ngi la iatai bad ngi la pan ia ka jingshaniah jong kijuh ki briew. Watla katta, nga ju kynmaw beit, wat hapdeng ka jingshit ka jingialap elekshon, ym ju kynthoh shimet haba ai jingkren”.
