Shillong, Nailur 23: Ki nonghikai hapoh ka lama jong ka Meghalaya Government Lower Primary Contractual Teacher’s Association (MGLPCTA) kila pynbna ba kin bteng beit iaka jingiakhih da kaba sah miet bad sngi hakhmat u Motsahnam jong u Kiang Nangbah, Shillong wat lada ka sorkar jylla kala kren shai ba kam lah ban thungkam biang ne ban pynkylla iaka polisi treikam.
U Dkhot ka MGLPCTA u Bah Babitdor Hoojon ula ong, watla u Myntri ka tnat pule puthi bah Lahkmen Rymbui ula pynpaw ba ka sorkar kam lah ban pynkylla iaka polisi ban thungkam biang iaki nonghikai Contract, hynrei ka kynhun ki nonghikai kan sa shim da kawei pat ka sienjam bad ia mynta kumba la dep pynbeit, kin bteng beit iaka jingiakhih ka jongki ban sah ha katei ka jaka.
“Ki nonghikai na kawei pa kawei ka district kin hap ban sah lai sngi ha katei ka jaka bad ynda la kut ka lai sngi yn sa wan ban sah sa da kiwei pat ki nonghikai na kawei pat ka District bad kane kan iai bteng beit shwa” ong u Bah Hoojon haba bynrap “Mynta ki dang don tang ar tylli ki District kiba dang dep ban sah ha katei ka jaka bad ki nonghikai kiba la shah wengkam ki don baroh 900 ngut eiei”.
U la iathuh, ki nonghikai contract kila shong la sah ha katei ka jaka naduh ka 13 tarik u Nailur ban dawa naka sorkar ba kan thungkam hikai biang ia ki namar ba kila don hapdeng ka jingeh kaba khraw ban pyndap iala ka iing ka sem khlem da don iaka kam ka jam kaba biang.
U Bah Hoojon, ula iathuh ba ki nonghikai contract kila shah weng kam noh kadei tang namar ba kim shym la pass ia ka Meghalaya Teachers’ Eligibility Test (MTET) bad ula kynnoh ba kadei namar ka jingbakla jong ka sorkar jylla namar kadei ban pynlong ia ka eksam MTET ha u 2010 hynrei kala pynlong iaka eksam ha u 2019 bad kala buh ha ka jingeh ia ki nonghikai kiba heh ka rta ban iakhun iaka eksam bad kito kiba dang shu rung thymmai haka kam hikai.
Ula ong, ka jingshah weng kam syndet kala ktah jur bha iaka lawei ka jongki ban ioh kam shawei khamtam haba ka rta ka jongki ruh kala palat na ka bynta ban aplai kam da kawei pat.
