Shillong, Rymphang 16 : U Lat ka Jylla CH Vijayashankar ula pyntip ba ka Meghalaya kala shim ia ka sienjam kaba kongsan ha kaban iapynbeit ia ka jingiakajia pud bad ka Assam da kaba pynieng ia u mawpud ha ki ar na ki hynriew tylli ki sector bala dep iapynbeit.
“Ka jingthung ia u mawpud ha khappud ka Assam-Meghalaya ka dei ka sienjam ka ba kongsan ha ka ban pyntreikam ia ka Memorandum of Understanding hapdeng ka Assam bad Meghalaya na ka bynta ki hynriew tylli ki jaka ba iakajia” ong u Vijayashankar haba ai jingkren ha Iingdorbar Thaw Ain hynne ka sngi Nyngkong.
U pyntip ba ka jingphiah ia u pud u sam ka dang iaid shaid shaid, bad “haduh 54 tylli ki mawpud lah dep ban thung ha ka thain Hahim bad 83 tylli ha ka thain Gizang”.
U Lat ula pyntip ruh ia ka jingpynkhlain ka jingpeitngor ha ki jaka khappud ka Jylla bad ka Bangladesh.
“Ka Jylla kala pynkhlain ia ki bor pahara ha khappud ka Indo-Bangladesh lyngba ka jingiatreilang kaba iajan bad ki BSF da kaba pynkhlain ia ki bor syntiat bad pynjur ka jingpeitngor” ong u Vijayashankar.
Halor ka bor treikam ka Tnad Pulit, u Lat ula pyntip ia ka jingplie paidbah ba dang shen ia ka Counter Insurgency &Jungle Warfare School ha Baghmara bad ong “Kane kan pynkhlain ia ka jinglah ka Jylla ban ai jinghikai ia ki bor shipai ba kyrpang ha ka jingiakhun pyrshah ia ki kam kaikhlaw bad ki kam lehnoh”.
U Lat ula pyntip ruh ba ka Meghalaya kala sdang ban pyntreikam ia ki lai tylli ki ain kam bymman-The Bharatiya Nagrik Suraksha Sanhita, Bharatiya Nyaya Sanhita, bad Bharatiya Sakshya Adhiniyam.
