Shillong, Rymphang 16 : U Lat ka Jylla CH Vijayashankar ula kubur ba da ki hajar hajar ki longiing kila duh ia ka kamai jakpoh hadien ba khang ka National Green Tribunal (NGT) ia ka jingtih dewiong thliew khnai, hynrei pyntip pat ba ka Meghalaya kala nang iaid suki suki sha ka jingtih dewiong da ki kyndon ain.
“Naduh ba ka NGT ka khang ia ka jingtih dewiong thliew khnai, bala pynksan da ka Iingkashari Supreme Court, da ki hajar hajar ngut ki briew kiba shaniah na ka kam tih dewiong kila duh noh ia ka kamai jakpoh” ong u Lat ha Iingdorbar Thaw Ain haba ai jingkren ha ka sngi sdang jong ka Dorbar Mang tyngka hynne ka sngi Nyngkong.
“Ka Sorkar kala trei khlem shongthait ban wanrah ia ka jingkylla ha kane ka kam da kaba jam sha ka jingtih dewiong kat kum ka juk saian bad ka rukom tih par kaba neh” ula ong.
Haba pynpaw ba kane ka jingpynkylla ia ka policy kala wanrah ia u soh, u Vijayashankar ula ong “Lai ngut ki nongthep aplikeshon kila ioh ia ka jingmynjur bad kila sdang iaka jingtih dewiong kat kum ka jingstad saian, bad ia u dewiong la shalan ha kylleng ka ri lyngba ki surok bad ki lynti rel”.
“Nalor kane, sa 20 tylli ki aplikeshon lah dep ban phah bad mynta ki don ha ka jingbishar ban ioh ia ka jingbit, kaba pyni ia ka jingjam suki suki sha ka jinglah wanrah biang ia ka lad kamai jakpoh haba pynthikna ia ka jingkitkhlieh haba phai sha ka mariang” ula bynrap.
Kane ka jingkren kala mih hadien katto katne sngi ba jia ka jingbthei ka par tih dewiong beain ha Mynsngat-Thangsko, East Jaintia Hills, ka jingjia kaba ki Liang Pyrshah kila buh jingkylli haba iadei bad ki lad ki lynti ban wanrah ia ka jingshngain.
U Lat ula jubab ba ka Sorkar “kala rai ban thung ia ka Judicial Inquiry Commission hapoh ka omissionn of Inquiry Act, ban tohkit ia kane ka jingjia”.
Palat 30 ngut ki nongbylla kila iap ha ka jingbthei kane ka par dewiong ha Mynsngat-Thangsko.
Haduh mynta, 14 ngut ki briew kila shah kem hadien ki 62 tylli ki ejahar (kynthup ia 5 tylli hashuwa ka jingjia ha Mynsngat-Thangsko), bala ujor pyrshah ia ka jingtih dewiong beain hapoh ka District.
Ki bor Sorkar kila kurup haduh 15,224.72 metric ton u dewiong bala dep shim jingkhein nalor ki 25.5 kilo u bomb gelatin bad 74 tylli ki detonator.
Ka Director General of Police (DGP) kala thung ia ka kynhun Special Investigation Team (SIT) ban tohkit ia ka jingbthei kane ka par khnang ban pynthikna ba ka jingtohkit kan poi sha kaba kut bad kaba don jingmut bad ban leh eiei kat kum ka ain.
 ia ka jingtih dewiong thliew khnai, hynrei pyntip pat ba ka Meghalaya kala nang iaid suki suki sha ka jingtih dewiong da ki kyndon ain.){kind=link}