Lah sdang tohkit ka SIT, pyntip u DyCM
Shillong Rymphang 14: U Symbud Myntri Rangbah ka Jylla ba khmih ia ka kam Pohiing Bah Prestone Tynsong ula pyntip ba shen yn sa pynmih ia ka jingpynbna bala thung ia ka Judicial Inquiry Commission kaban tohkit bniah ia ka jingbthei ka par dewiong ha Mynsngat-Thangsko, kaba la shim ia ka jingim ki 31 ngut ki briew ha East Jaintia Hills district.
Ha kajuh ka por, ka Special Investigation Team (SIT) jong ki pulit kala iaid shakhmat ha kaban tohkit ia katei ka jingjia.
“Nga tharai, ba ka jingpynbna ban thung ia ka Inquiry Commission kan sa mih noh shen, lehse ka lah ban dei mynta ka miet ne lashai ka sngi” ong u Bah Prestone Tynsong haba iakren bad ki nongthoh khubor.
Ia kane ka Commission, lah ban khlieh da u Nongbishar ba lah shongthait ryngkat bad 2 ngut ki dkhot, kin tohkit ia katei ka jingjia kaba la lam sha ka jingiap jong ki 30 ngut ki briew bad kaba don ia ka jingiadei bad ki kam tih be-aiñ.
“Ngi lah dep ban shim ia ka rai ba dei ban don ia ka Judicial Inquiry Commission kaban ngam jylliew ha baroh ki liang kiba iadei bad ki kam be-aiñ kaba la jia bad kumjuh ruh halor ka jingjia kaba sngewsih” la ong u Bah Tynsong.
Ka Special Investigation Team (SIT), kaba la thung da ka jingbthah ka DGP kala sdang ia ka jingtohkit ka jongka.
“Ka SIT kala sdang ia ka kamram ka jongka, kumta ngin ia ap shwa, ba kin aiti ia ka kaiphod ka jongki” ong u Bah Tynsong.
U Symbud Myntri Rangbah ka Jylla ula pynthikna ba kila don katto katne kiba la shah kem ha kaba iadei bad ka jingioh da kaba suk ia ki tiar pynbthei ha katei ka district.
“Ngi lah ioh ban kem ia katto katne” la ong u Bah Tynsong bad ka jingtohkit ka dang iaid shakhmat.
Ki bor kiba dei khmih kila iaid shakhmat ia ka bynta jong ka jingtohkit ia ka jingpyniaid ia ki tiar pynbthei, khamtam ha kaba iadei bad ki aiñ ki kanun ha ka rukom ia die ia thied.
“Mano kiba khaii be-aiñ ia kine ki tiar pynbthei, baroh kine ki bynta kidei kiba la shimkhia bha” ong u Bah Tynsong.
Ka SIT kala sdang ia ka kam ka jongka bad la khmih lynti ba shen yn sa ioh noh ia ka resol.
“To ngin ia ap shwa mynta, ngin sa lah ban tip kumno ka long” ong u Bah Tynsong.
Nalor kane u Bah Tynsong ula banjur ba ka sorkar ka iengskhem ban pynsangeh ia ka jingtih dewiong be-aiñ ha Meghalaya, hadien ba kala mih katei ka jingjia.
“Ngi lah dep bthah ia ki bor pyniaid district ba kidei ban pynthikna ba dei ban pynsangeh shi syndon ia ka jingtih dewiong be-aiñ ha kano kano ka kyrdan” ong u Bah Tynsong.
Ha kaba iadei bad ka jingsngewkhia ia ka jingkamai jakpoh, u Bah Tynsong ula buh jingkylli ia ka jingdonbynta ki nongbylla kiba na kylleng ka ri.
“Haba phi ong, ka kamai kajih (kadei ka daw kaba sha lyndet ban donbynta ban tih be-aiñ ia u dewiong), naei phi ioh katei ngut ki nongbylla kiba wan na kylleng ki bynta jong ka ri?” ula buh jingkylli.
U Symbud Myntri Rangbah ka Jylla ula pynthikna ba ka sorkar ka iengskhem ban leh da kaba tyngeh halor katei ka jingjia.
“Ngi donkam ban mih shakhmat bad ngi donkam ban leh da kaba tyngeh bha halor katei ka jingjia. Ngin ym ailad ia ki kam be-aiñ ban jia hapoh ka jylla” ong u Bah Tynsong.
