Shillong, Rymphang 13 : U Myntri Rangbah ka Jylla Conrad K Sangma ha ka sngi Thohdieng, ula ban jur ia ka jingdonkam ban thaw ia ki lad kamai kiba lai phew jait na ka bynta ki samla ka Jylla.
Ula pynpaw ia kane haba plie ia ka District Emporium ha District Commerce & Industries Centre (DCIC), Williamnagar, kaba dei ka sienjam kaba khraw ban pynkhlain ia ka sengkam sengjam ki samla ka thain bad ban pyniaid iew ia ki tiar thain kti jong ki trai shnong nalor ki mar ba pynmih hi ha East Garo Hills.
U Myntri Rangbah ula pynpaw ba hapdeng 50,000 bad 60,000 ngut ki samla kila rung ha ka jylli trei kam ha Meghalaya manla u snem, katba ki kam Sorkar kiba lait ki don tang hapdeng 1200 haduh 2000 tylli ki shisnem.
Khlem ki sienjam ba lah ban aikam aijam bad kyntiew ia ka ioh ka kot, ula maham, kane ka jingiapher ka lah ban wanrah ia ka jingeh kaba khraw ha ka imlang sahlang bad ka ioh ka kot.
“Ki plan bad policy jong ngi kin hap ban khmih ia kane ka jingshisha. Lada ngim lah ban thaw ia ki lad ki lynti na ka bynta ki samla, kan sa wanrah ia ka jingtynjuh kaba khraw ha ka ioh ka kot, ka imlang sahlang bad ka sain pyrthei” ula ong.
Haba kren halor ka lynti iaid ka roi ka par jong ki snem ban wan, ula bynrap “Ka thong jong ngi ia ka ioh ka kot ba $10 billion kam dei eh tang halor ka jingkynjoh ia ka jingkiew shaphrang, hynrei ka long eh ban lah pynioh ia ki lad kamai kiba iai neh lyngba ki kam bapher bapher kum ka kam jngohkai, ka rep ka riang, ki karkhana bad khaii pateng bad ka Information Technology. Lada ym don ia ka thong, ki briew kin sa shu jah rngai”.
U Myntri Rangbah ula kren ruh halor ki project kiba heh jong ka DCIC kynthup ka Food Processing Unit ba T.25 klur ha Tikrikilla, kaba shalan iaki Nokma Ice Cream da kaba pyndonkam ia ki mar ba pynmih ki nongrep, ka Processing Unit jri ha Songsak ba T.20 klur bad ka karkhana pynpjah bad pyntyrkhong ia ki marrep ba T.25 klur, ka ban sa pyndep hapoh u Iaiong-Jymmang, ka ban kyrshan ia ki nongrep sohtrun, sohniamtra, bad ka kait ha Ri-lum Garo.
Ula ai nuksa ruh ia ka Ronggara Processing Unit kaba pynmih ia u A’wang Chips kum u marbam ba pynmih na ki marrep ba mih na ka thain.
U Myntri Rangbah ula pynsngew ruh ba kum kine ki emporium dei ban pynkha ha kylleng ka Jylla bad ai jingmut ban iatehlok bad ki Self Help Group bad ki nongsengkam shimet ba kin pyniaid ia ki ha ka rukom kaba dei.
“Ka bynta jong ka Tnad ka long ban pynwandur ia ki policy, pyntreikam ia ki skhim bad ban ai ia ki jingkyrshan” ula pynpaw.
Kiwei pat kiba la ai jingkren ki kynthup ia u Myntri ka PHE Marcuise N Marak bad kiwei kiwei.
