Shillong, Rymphang 04 : Ka Iingkashari District ka West Jaintia Hills, kala hukum ban set phatok shirta jingim ia u briew uba pyniap ia la ka jong ka kurim da kaba thang im ia ka mynta la jan arphew snem.
Ka Iingkashari jong u Session Judge, Jowai, kala pynngat sajia ia u Stam Surong, u nongshongshnong ka shnong Mukhla Nongrim, haba iadei bad ka case no 37 u snem 2015. Ka Iingkashari kala shem ba u donkti hapoh ka kyndon 302 jong ka Indian Penal Code (IPC) ba pyniap iala ka kurim.
Kat kum ka jingong ki Pulit, kane ka jingjia ka dei kaba jia ha ka 8 tarik Nailur 2006, ha kaba u Surong ula pynsum da ka umphniang sharak iala ka kurim bad sa aiding ia ka, hala ka jong ka iingsah ha ka por 5 baje mynstep. Kane ka lanot ka kyrteng ka kong Before Sari, kaba la mynsaw jur bha, kala batai ia kaei kaba jia sha ki bahaiing hasem, hashuwa ba kan khlad na kane ka pyrthei.
Ia ka ejahar la mudui da u Bah Barwill Singh Sari ha Ummawlong Beat House, bad hadien ki Pulit ka Jowai kila register ia ka case hapoh ka kyndon 302 IPC. Ia ka jingtohkit la khlieh da u Sub-Inspector A.Rymbai.
Hadien ba pyndep ia ka jingbishar, ka Iingkashari kala rai pynrem ia u Surong bad pynngat ha ka jingpynsajia da ka set phatok shirta jingim. Nalor kane, ka Iingkashari kala dain kuna ruh T.5000 ia une u nongleh bymman.
