Shillong, Rymphang 2: Ki pulit ka East Khasi Hills ki la pynjari da ki kyndon khang kali lyngba ka tnad traffic ban pynkylla lynti iaid kali ha ki bynta jong ka Upper Shillong namar ka jingtrei ka dang iaid shakhmat ha shilynter ka surok Shillong–Dawki hajan ka Mahadev Khola Dham ha ka 101 Area.
U Superintendent of Police ja East Khasi Hills u pyntip ba ka jingiaid jong ki trok, kynthup ki 407, 409 bad ki kali kamai, yn dang pyrrkhing ha ka jingjngai kaba kot kumba 250 meter eiei.
Ia kine ki kali yn phah iaid lyngba ka lynti na 5th Mile, Upper Shillong sha Shillong Peak–Pomlakrai, bad na MES (Rilbong) point lyngba ka Anjalee Point–Barik Point–Dhankheti–Fire Brigade Point–Madanrting–Laitkor–Pomlakrai.
Baroh ki kali heh ne Heavy Motor Vehicles (HMV) kiba wan na Nongstoiñ bad Mawngap kin ïaid lynti na lad Mawmaram sha ka surok Lawmei–Umsaw, katba kito kiba wan na Sohra bad Pynursla yn pynïaid na 7th Mile, Upper Shillong, sha Mawngap–Mawmaram.
Hynrei, ia ki bus ba kit ia ki khynnah skul yn shah ba kin iaid sha ka MES point na Upper Shillong bad kin wan phai ruh najuh, la ong ki pulit.
Nalor kata, la buh kyndon ïa ka jingiaid stet jong baroh ki jait kali hapoh 20 kmph ha kylleng ki jaka ka 101 Area baroh kawei na ka bynta ka jingshngaiñ jong ki paidbah.
Ki kyndon pynïaid kali kin treikam naduh ka 3 tarik u Rymphang haduh ka 18 tarik u Rymphang.
