Shillong, K’lyngkot 30 : Ka Meghalaya kala pynkhreh shaid shaid ban pynlong ia ka 39th National Games ha u snem 2027 bad u Myntri ki kam ialehai Bah Wailadmiki Shylla ula pyntip ba ki jingpynkhreh baroh kila iaid ha ka lynti kaba dei.
“Mynta ka sngi u Symbud Myntri Rangbah ba khmih ia ka Tnad Pynroi Sor Bah Sniawbhalang Dhar ula shong bishar kam halor ka jingpynkhreh ia ka 39th National Games. Ngi la batai bniah ia kiei kiei baroh ha u-ki jingtei, ki jaka sah, bad ki jing ialehkai ki ban pynlong ha kylleng ki bynta jong ka Jylla. Ula kmen bad kaei kaba la batai” ong u Bah Wailad haba iakren bad ki nongthoh khubor hadien ka jingialang ha ka sngi Thohdieng.
U Myntri ula pynpaw ruh ba ki jingpyntrei ia ki madan kila iaid bha shaid shaid bad ki kam ha madan kum ka JN Complex bad PA Sangma Stadium kila jan dep artad.
Haba iadei bad ki jaka sah, u Bah Wailad ula ong ba ki Games Village ki lah ban nym long shuh kiba donkam namar ka jing don jong ki hotels bad ki homestay. Ka jingbuhpor ban pyndep ia ki jingtrei ia ki jaka ialehkai ki iapher kawei na kawei pat bad la khmih lynti ba kin dep ha u bnai Lber, Jylliew lane ha u Naiwieng.
U Bah Wailad u pyntip ruh ba u Myntri ki kam ialehkai ka Sorkar Pdeng ula kyntu ia kiwei ki Jylla ka thain Shatei Lam Mihngi ba kin iashimbynta lang bad ka Meghalaya kala mynjur ban ai sha ki ia ka hok ba kin pynlong ia ki jingialehkai bala jied ban ai sha ki ha ki Jylla jong ki.
“Ka dei ka jingkyrpad na ka Ministry ba ki kwah ba kiwei ruh ki Jylla ka thain Shatei Lam Mihngi kin iadon bynta lang ha ka National Games…Ngi la ai ha ki ia ka lad ba kin pynlong mar kawei ka jingialehkai” ong u Bah Wailad.
U Bah Wailad u pyntip ba ka jingkhein ia ka jingmang pisa ka dang iaid mynta bad bun ki tnad kila iadon bynta lang. “Ia mynta ngam pat lah ban batai ia phi namar ki don bun kiei kiei kiba dang iaid…..hynrei ngin sa wanrah ia ka jingmang pisa na ka bynta kane ka lympung ialehkai” ula ong.
