Shillong, K’lyngkot 28: Ki Pulit ka West Garo Hills, kila pynkhlain bha ia ka jingtohkit ban iohkem ia ki briew kiba donkti ha lyndet ka jingtah ia ka poster ha ka kyrteng ka ISIS-K, ba byrngem ia ki paid Garo ba kin mih na Tura bad ki jaka them ka District hapoh u snem 2027.
Kane ka poster ka dei kaba tah ha u post elektrik hajan ka Law College ha Araimile, Tura bad la lap ia ka ha ka step sngi Balang, kaba la wanrah ia ka jingsngewkhia kaba jur halor ka jinglong ka suk ka sain hapoh ka District.
“Ia ka poster lah dep banweng bad yn sap hah sha ka Forensic ban tohkit. Ngi la register ia ka case ha Araimile Police Station bad ka jingtohkit kala sdang” ong u Superintendent of Police Abraham T Sangma haba kular “Ngi la shim ia baroh ki sienjam ban lah pynithuh bad lap ia ki briew ba donkti ha lyndet ka jingtah ia ka poster bad kito kiba pynsaphriang ban pynsyier ia ki paidbah bad wanrah ia ka jingsngew pher jaidbynriew”.
U pyntip ba ia mynta, ym shym la don kum kane ka poster ka ban tah ha kiwei pat ki jaka jong ka District.
“Ha ka jingpeit la paw ba kane lehseka dei ka jingpyrshang jong kino kino ki briew ne kynhun ba kwah myntoi shimet ban pynrit mynsiem bad pynthut ia ka shongsuk shongsain ha ka district” ong u Sangma.
U SP ula kyntu ruh ia ki paidbah ba kim dei ban khuslai bad ban nym shah ialam bakla ha kum kine ki khubor ha ki social media lane kino kino ki rynsan kiba la pynsaphriang ban wanrah ia ka jingsngew iapher Jaidbynriew.
Kino kino ki jingishankhmat ne jingtip, la kyntu ia ki paidbah ba kin pyntip mar mar ia ka sha ki Police Station ba marjan, Outpost, Beat House lane Police Control Room, Tura ha kine ki mobile number – +91 8837423053, +91 7005530510 and +91 9089199064.
