Shillong, K’lyngkot 22 : Ka Tnad Urban Affairs ka Sorkar Jylla, kala pynkynriah ia 29 ngut ki nong shong dukan madan na ka lynti iaid ha syndah ka Shillong Civil Hospital, sha ka jaka shong dukan madan ba dang shu dep shna ha phylla ka tnad PWD ha Barik.
Ki nongshong dukan madan kila pynpaw ia ka jingsngewhun ia kane ka jaka thymmai bad pynpaw ba kila ioh pahun ia ka jaka bad jingiada na u slap bad ka lyer.
Kane ka jingweng ia ki dukan madan na lynti iaid kjat hakhmat ka Hospital kala iarap bad pynkylluid bha ia ka iaid ka ieng ki briew, ka jingiaid ki kali bad kham kongsan eh, ka jingiaid ki kali ba kit nongpang.
“Hapoh ka jingyni lynti ki jingai jingmut jong u Myntri Rangbah ka Jylla ban wanrah ia ka burom bad ka jingiada ia ka kamai jakpoh jong ki nongshong dukan madan, ka Tnad kala pyndep ia kane ka jingpyn kynriah ha ka war kaba ar, kaba nyngkong ka dei ka jingpyndep kaba jop ha Khyndailad” ong u Commissioner & Secretary ba khmih ia ka Tnad Urban Affairs ha ka kyrwoh bala pynmih ha ka sngi Palei.
