Shillong, K’lyngkot 22 : Ki Pulit ka ri-lum Jaintia kila ioh kem sa arngut ki briew kynthup u dkhot ka seng Hynniewtrep National Liberation Council (HNLC) Issei Sungoh, uba la ithuh kum u nongsuhbuit ha lyndet ka jingpynbthei bomb IED ha phyllaw ka Dhar Construction Company, kaba lajia ha ka 15 tarik Nohprah 2025, ha Shymplong, East Jaintia Hills.
Ia kine ki arngut la ioh kem ha ka sngi Palei ha ka jingkhynra kaba la pynlong lang hapdeng ki Pulit ka East Jaintia Hills bad ka West Jaintia Hills.
“U Issei Sungoh ba ju khot sin u Sei ne Bah (29) na Mynso B, West Jaintia Hills bad Embha Ladong (25) na Shymplong, East Jaintia Hills, kila shah kem ha ka jingkhynra bala pynlong lang da ki Pulit ka EJH bad WKH” ong u Superintendent of Police ka EJH Vikash Kumar ha ka kyrwoh ha ka sngi Palei.
“Ia kine ki arngut la rah tian bisahr hakhmat ka Iingkashari, kaba la aipor hynriew sngi ia ki Pulit ba kin tohkit bniah. Ka jingtohkit ia kane ka kam kala iaid shaid shaid mynta” ula bynrap.
U Issei Sungoh u dei u dkhot ka HNLC bala thwet jur da ki Pulit namar ka jingdonkti ha ka jingpynbthei bomb IED ha Police Reserve, Khliehriat bad kiwei kiwei ki kam be-ain.
U SP ula buh ruh ka jingkyrpad “lada don kino kino ki briew kiba don jingtip shaphang kiwei pat ki runar ba donkti ha kane ka kam beain, la kyrpad ba kin pyntip mardor sha ki Police Station ba marjan. Ia ka kyrteng bad jaka jong ki yn sa buhrieh bad yn sa ai buskit ruh kumjuh”.
Ka HNLC kala kami a ka jingdonkti ha kane ka jingpynbthei bomb IED, haba kynnoh ba kala pynlong sohpdung ia ki nongkynti jong u Symbud Myntri Rangbah Bah Sniawbhalang Dhar namar ka jingkyntait ban siew ia ka jingdawa pisa.
Shuwa kane, ki Pulit kila kem ia arngut ki briew ba donkti ha kane ka jingpynbthei bomb IED bad kine ki dei u Richard Suchen (31) bad u Pynshaitbor Syih (45).
 Issei Sungoh, uba la ithuh kum u nongsuhbuit ha lyndet ka jingpynbthei bomb IED ha phyllaw ka Dhar Construction Company, kaba lajia ha ka 15 tarik Nohprah 2025, ha Shymplong, East Jaintia Hills.){kind=link}