Shillong, K’lyngkot 22 : U Myntri Sorkar bad Nongialam ka BJP Bah Sanbor Shullai ula pynpaw ia ka jingsngew skhem ba ka party jong u, kan ioh ia ka jingkyrshan u paidbah ban wan biang ha ka bor ha ka elekshon ban wan ha Assam.
“Mynta ka kynti ruh, ngin sar bad ngin sa thaw ia ka Sorkar ha Assam. Kam don jingartatien ba u (Himanta Biswa Sarma) un wanphai biang kum u Myntri Rangbah ka Assam” ong u Bah Sanbor haba iakren bad ki nongthoh khubor ha ka sngi Palei.
Kane ka jingkynthoh u Bah Sanbor kala mih hapdeng ka jingnang jur ka jingleit ialap elekshon jong ka BJP ha Assam, ha kaba u Myntri Rangbah Himanta Biswa Sarma ula batai lypa ba ka party kan sar naphang ha ka elekshon Assembly 2026.
