Shillong, K’lyngkot 22 : U Nongialam ka BJP bad Myntri Sorkar Bah Sanbor Shullai ula kyrpad ia ki paidbah ka ri-lum Garo ba kin ai lem ka lad ia ka party BJP ha kane ka elekshon ban wan jong ka GHADC, haba kdew iaki kam pynroi bala wanrah da ka Sorkar u Myntri Rangbah Duh Narendra Modi.
“Ngi la iohi ba tang hapoh ka 10 snem, la ka long ha ka ri baroh kawei lane ha ka Jylla Meghalaya jong ngi, namar ka jingkyrshan kong u Modi bad baroh ki Myntri ka Sorkar Pdeng, ki paidbah ki dei ba iohi ia kaei kaba jia ha ki 46 snem bala leit bad mynta. Hapoh 10 snem naduh ba thaw ia ka Sorkar MDA I bad II, kki paidbah kila sakhi ia shibun ki skhim pynroi khamtam ha ka liang ki surok, highway bad kiwei ki kam pynroi wat ha ka constituency jong nga ruh, bad ha New Shillong, bun ki project kila mih” ong u Bah Sanbor.
Ula ban jur ba ka BJP ka dei ka party kaba pynleit jingmut ha ka roi ka par khamtam ha ka liang ka jingpyniasoh ia ki surok kiba bha, ki highway bad kiwei kiwei ki jingtei ba kongsan.
U Bah Sanbor ula pynpaw ia ka jingsngewskhem ba ka BJP kan jop 8-10 seat ha ka elekshon GHADC bad kyntu ia ki nongthep vote ba kin ai sha ka party la kumno kumno 20 seat ba kan ioh ban thaw ia ka Sorkar.
U pyntip baka BJP ka dang wad ia ki kyrtong na ka bynta ka elekshon GHADC, da ka jingthmu ban pynieng kyrtong na bun tylli ki constituency.
“Ka bynta jong nga ka long ba hadien ba ki ai dak, kum u MLA ngan sa leit ban rung ha man ki constituency bad ngan ialap tyngeh na ka bynta ki kyrtong jong ngi” kular u bah Sanbor.
