Shillong, Nailur 21 : U National Vice President ka National People’s Party (NPP) bad Symbud Myntri Rangbah ka Jylla Bah Prestone Tynsong, hynne ka sngi Balang ula ther tyngeh ia u Nongaiktien ka All India Trinamool Congress (AITC) Saket Gokhale namar ka jingpyrshang ban pynkulmar jingmut ia ki paidbah halor ka jingpyntreikam ia ka Shillong Smart City project ban myntoi ha ka kam sain pyrthei.
“Haba nga kren shaphang ka Shillong Smart City Limited, u (Gokhale) ula ong bla, bla, bla hynrei baroh ki don lut ha ki jingthoh. Ka mut ba kine ki briew ki shu pyrshang ban pynkulmar jingmut na ka bynta ban myntoi ialade ha ka kam sain pyrthei…hynrei baroh ki don lut ha ki kot ki sla” ong u Bah Prestone haba iakren bad ki nongthoh khubor.
U Bah Prestone ula bthah ruh ia une u Nongaiktien ka AITC ba ha ka jaka ban tuklar hangne, u dei ban ai ia ki jingtip shaphang ka Kolkata Smart City Limited.
“Nga ruh ngan kylli na u halor ka Kolkata Smart City Limited bad iathuh ia nga mynno ba la file ia ka statement of account (ka jingkhein jingdiah halor ka jingioh bad jingpynlut ia ka pisa). Ai ba un iathuh ia nga mynno bala file namar kila sdang ia ka project ha u snem 2016 katba ma ngi pat ngi sdang ha u 2018-2019” ong u Bah Prestone.
Lah ban kdew hangne ba u Nongaiktien ka AITC ula dawa ia u Symbud Myntri Rangbah ka Jylla ban pynshai ba balei ka Shillong Smart City Limited, kam shym la shong ia ka Annual General Meeting mynta la lai snem-2019-2020 bad 2021.
Ula ong ba lada kala dep shong, phi donkam ban pynshai bad ai ka jingbatai kaba biang balei ba kane ka kompani ka khlem file ia ka statement of Account ha kine ki lai snem.
Kat kum ka jingong jong u, kane ka kam ka dei kaba kongsan bha naba ka dei ka pisa u paidbah kaba dei ka hok jong baroh ki Nongshongshnong ka Jylla Meghalaya bad jong ka Ri India baroh kawei.
