Pan jingshai ka HYC halor ka MRSSAB hadien ki jingkynthoh u DyCM

Shillong, K’lyngkot 05 : Ka Hynniewtrep Youth Council (HYC) kala kynthoh tyngeh halor ka jingkren ba dang shen jong u Symbud Myntri Rangbah Bah Prestone Tynsong ba ong ba ia ka Meghalaya Residents’ Safety and Security (Amendment) Bill, 2020 la ieh ba kan shu iap hi noh namar ka jingbym lah pynlong ain na ka daw ka jingbym ler treikam ka Sorkar ba ialam u Dr Mukul Sangma.

Ha ka kyrwoh, u President ka HYC Bah Roykupar Synrem ula ong “Kam dei ka jingpyni jingmut sain pyrthei, ka dei ka jingpyni dalade ia ka jingbym lah kane ka Sorkar ba mynta”.

Ula ban jur ba ka ain kam ju iap hi dalade, ka iaid shakhmat da ka jingmut ban pynlong ain lane la shu iehnoh lyngba ka jingbym leh eiei ki bor Sorkar.

“Ka rekod ka long kaba shai bad ka bym lah ban iawohnia. Ia ka MRSS Amendment Bill la wanrah ha Iingdorbar Thaw Ain ha u Lber 2020 da u Myntri Rangbah ba mynta. Ha u Naiwieng 2023, ia ka Billa la pynphai pat da ka Ministry of Home Affairs ban bishar thymmai. Naduh katei ka por, ka Sorkar kala iai kular ia ki paidbah ban shong bishar thymmai, iasyllok ia ki riewsaidain bad iakren bad ki kynhun bapher bapher. Hynrei, wat hapdeng ka jingdon bun paid bad ka por kaba pahuh, ym shym la don kano kano ka amendment ia ka principal act bala wanrah hapoh ka Iingdorbar” ong u Bah Synrem.

Une u President ka HYC ula kynnoh ia kane ka Sorkar ba mynta ba ka bynshet ia ka jingbah khlieh ha ka Sorkar kaba rim bad ong “Ka jingduna ha ka ain, lad aka don, lah dei ban pynbeit ia ka ha kano kano ka por ha ka por ba synshar ka Sorkar MDA. Ka jingbym leh ia kane kam dei kaba la rim bah hynrei ba dang mynta”.

Kane ka seng ki samla pule kala pyni ruh ia ka jingkren ba iapher ha ka nongrim jong ka Sorkar.

“Ki jingiai kam ba ka Sorkar Pdeng kam shym la kyntait ia ka Bill, ka iapher ia ka jingkubur ba mynta ba la ailad ba kan shu iap noh. Kine ki nongrim ki bym ïahap ki pynskhem ïa ka jingsngewthuh jong ka jingbym lah ban rai bad ka jingbym shimkhia halor ka mat kaba ktah beit ïa ka jingshngaiñ jong ki trai ri trai muluk bad ka jingshong suk shongsaiñ” ula ong.

Ka HYC kala maham ba ka jingailad ia ka ain MRSSA ba kan shu iap khlem ka jingwanrah bujli da kawei, ka pyni ia ka dak ka jingma ba ka jingiada ia ki trai ri trai muluk ka dei ka kam kaba lah ban iakren pynbeit, pynkynriah bad ka bym long kongsan”.

Ka HYC kala dawa ia ka jubab kaba shai na ka Sorkar Jylla haba pynpaw ba ka seng kan buddien ia kane ka kam lyngba ki lynti ba jai jai bad kat kum ka riti synshar ka ri tad haduh ba ka Sorkar ka ai ia ka jingshai, ka jingkitkhlieh bad pyni ia ka kam.