Shillong, K’lyngkot 03 : Ka Iingkashari Meghalaya High Court kala hukum ia ka Sorkar Jylla bad ia ka Garo Hill Autonomous District Council (GHADC) ba kin aiti ia ka kaiphod halor ki sienjam bala shim ban phiah ia ki bor treikam hapdeng ka Executive bad Judiciary ka ADC ka Ri-lum Garo hapoh ka 28 tarik K’lyngkot.
“Ka kaiphod ha ka dur jong ka affidavit dei ban ai da ka Sorkar bad ka District Council ka ban pynpaw ia ki sienjam bala shim halor kane ka hukum hapoh kane ka sngi shong bishar ban wan. Ia kane ka kam buh ban bishar biang ha ka 28.01.2026” ong ka Division Bench ba kynthup ia u Chief Justice Soumen Sen bad Justice HS Thangkhiew ha ka hukum bala pynmih hadien ba shong bishar ia ka PIL bala mudui da u Flaming B Marak myn ha ka 10 tarik Nohprah, 2025.
Une u nongmudui bala mihkhmat da u nongiasaid PT Sangma, ula pynpaw ia ka jingpynkhein ia ki nongrim ka riti synshar ban phiah ia ki bor treikam.
Ki jingtip bala ioh na u Public Information Officer, General Administration Department, GHADC, ka pynpaw ba une u juh u briew u bat kam hapoh ka Executive bad ka Judiciary.
Ka Iingkashari kala shimkhia ba kane ka jingtrei arkam ka long pyrshah ia ka Rule 10 bad 11 jong ka GHAD (Administration of Justice) Rules, 1953, kaba kren shai ban don ka jingphiah ia ka bor treikam hapdeng ka Executive bad ka Judiciary.
“Kane ka jingtip kala pynpaw ia ka jingshisha kaba ima ba ia ka Judiciary ym pat phiah satia da kano kano ka jingpynbna na ka Ophis. Kane ka long pyrshah ia ka Rule 10 bad 11 jong ka Garo Hills Autonomous District (Administration of Justice) Rules, 1953.”
U SRR Marak, uba la shah thung kum u Additional Judge ka District Council Court naduh ka 30 tarik Nailar 2023, ula treikam ruh kum u Secretary ka Executive Committee.
Ka Iingkashari kala pynbna ba u dei ban iehnoh mardor ia ka kam jong ka Executive.
 ba kin aiti ia ka kaiphod halor ki sienjam bala shim ban phiah ia ki bor treikam hapdeng ka Executive bad Judiciary ka ADC ka Ri-lum Garo hapoh ka 28 tarik K’lyngkot.){kind=link}