Shillong, Nohprah 23 : U MLA ka North Shillong Bah Adelbert Nongrum ula ban biang ia ka jingdawa ban pynsted noh ia ka jingpynkynriah ia ki Longiing kiba sah ha Them Metor, Them Iew Mawlong.
Haba kren sha ki lad pathai khubor, u Bah Adelbert ula ban jur ia ka jingdonkam ban pynbiang tarajur ia ki jingkynthoh pyrshah bad ka jingiaroh ia ka Sorkar Jylla.
“Nga don tang kawei ban ong: ki don ki por ba nga hap kren pyrshah lada kane ka Sorkar ba mynta ka leh ia ki kam ba bakla, bad ka don ka por ba nga hap iaroh bad ai jingiaroh ia ka Sorkar lada ka leh ia ka kam kaba bha” ula ong.
Halor ka jingsahteng ban pynkynriah ia ka Them Metor, ula pynshai ia ka nongrim jong u na ki kyntien bad kaei kaba ula leh ha ka por ialap ia ka elekshon 2023.
“Ngam sngewtynnad ban pyndonkam ia ka kyntien ‘Harijan’ lane ‘Sweeper Lane’ naba kane kan nang aibor ia kine ki briew lada ngi leit sha ki Iingkashari. Kumta, kum u MLA, hashuwa ban kut ka jingialap elekshon 2023, nga khlem leit ban pan ia ka jingkyrshan na ki longiing ba sah ha Them Iew Mawlong namar ngam kwah ban iapein ia ka nongrim jong nga bad ka elekshon”.
Ula ban jur ia ka rai kaba skhem ba un iada ia ka hok ki riewlum haba iasaid ban pyrkhat lang ia ka jingsngew para briew da kaba ong “Phi lah ban ong ba u Adelbert u dei uba shun ia ki bar jylla hynrei ka jingshisha hi ka iai long : Lada ki kyntur sha ka hok jong ngi, ngi hap ban don ka jingsngewpher ban iada ia ka hok bad ka jingmyntoi jong ki paidbah lajong. Ki don ki por ba ngi hap ban kren na ka bynta ka Jaidbynriew, bad ka don ruh ka por ba ngi hap ban kren ia ka jingsngew para briew”.
U Bah Adelbert ula pynpaw ia ka jingsngewsih halor ka jingbym shah kynthup lang ha ka High-Level Committee kaba pynbeit ia kane ka kam hynrei ula pynskhem ia ka jingbteng ban iadon bynta lang.
“Nga kular ia ki paidbah ka constituency jong nga, ba ngan ym shong lane iapein wat lada ka Sorkar kam shym la kynthup ia nga kum u dkhot ka High-Level Committee. Ngan iai bteng ban buddien ia kane ka kam” ula ong.
Ula kyntu ia ka Sorkar ban pynsted noh ha kaban pynkynriah ia ki longiing bad ban pynroi ia ka thain nalor ban pynduna ia ki jingma ba ktah ia ka koit ka khiah.
