Shillong, Nohprah 23 : U MLA ka North Shillong Bah Adelbert Nongrum ula kyntu ia ka Sorkar Jyllaban leh eiei noh ha kaban siewkhuid iaki bill ba sahteng ki contractor,haba ban jur ia ka bynta kaba khraw ba ki contractor ki leh na ka bynta ka roi ka par ka Jylla.
Haba iakren bad ki lad pathai khubor, u Bah Adelbert ula pynpaw ia ki jingiai ud iainam jong ki contractor bad kyntu ia ki bor Sorkar ba kin shim mardor ia ki lynti ban pynbeit.
“Ngi la iohi ba ki contractor kila pynpaw ia ki jingud jingnam na ka por sha ka por, kumta nga shim ia kane ka kabu ban kyntu ia kane ka Sorkar ba mynta ba kan shim ia ka sienjam bad mynjur kyrpang noh na ka bynta jong ki-ym tang ha ka constituency jong nga hynrei ha kiwei kiwei ruh- naba ki dei shibynta jong kiba noh synniang sha ka jingkiew shaphrang ka Jylla” ula ong.
U bah Adelbert ula pynshai ba ki jingkynthoh jong u kim dei kiba thmu kum ka jingpynrem ia kano kano ka tnad hynrei ka dei ka jingkyrpad ba tei ba kum kine kiei kiei kin nym mih shuh hadien habud.
