Shillong, Nohprah 21 : U Symbud Myntri Rangbah Bah Sniawbhalang Dhar ula pynthikna ba ka Sorkar kan ym pyndem pyrshah ia ki kam pyntriem ki kaikhlaw, haba pyntip ban ym sngap jar ne ailad ruh ia ki jingbyrngem na ka HNLC.
U Bah Sniawbha ula pynrem jur ruh ia ka jingpynbthei bomb improvised explosive device (IED) ha phyllaw ka Dhar Construction Company ha Shymplong, East Jaintia Hills.
“Ngi na ka Sorkar ngin ym shu sngap jar ia kum kine ki jingbyrngem. Ngi pyrshah jur ia kine, khamtam haba tip ba ka HNLC ka dei ka seng bala khein beain. Donbok, ki Pulit kila shimkhia mardor bad kem ia katto katne ki briew, bad ngi ngeit ba ki Pulit kin leh ia ki kam kat kum ka ain” ong u Symbud Myntri Rangbah.
Ula kynthoh jur ruh ia ki jingkren khieh khlieh tdong tdong jong ka HNLC haba iadei bad ka jingdawa pisa haba ong “Phi la iohi ba kila kren khlieh khlieh tdong tdong da ma ki hi. Katto katne bnai mynshuwa kila kam ba u Bah Sniawbhalang Dhar ula siew ia ka jingdawa bad mynta kila ong ba u khlem siew sha ki. Kumta, kine ki jingkynnoh baroh ki dei ki bym shong nongrim bad bym iahap”.
U Symbud Myntri Rangbah ula ban jur ia ka jingkut jingmut ka Sorkar ban iakhun pyrshah ia ki kam pyntreim ki riewkiengatiar bad ki nongpynthut ia ka suk ka sain haba kyntu ia ki paidbah ba kim dei satia ban sheptieng.
“Nga kwah ban phah ia ka khubor kaba shai sha ki paidbah ka Jylla, kynthup ki samla, ba ngin ym pyndem ha kino kino ki kynhun kaikhlaw. Ngi long pyrshah ia ki kynhun ba pynthut ia ka suk ka sain ka imlang sahlang. Ngi kyntu ruh ia ki paidbah ka Jylla ba kim dei ban sheptieng naba ka Sorkar ka iadon ryngkat bad ki”.
Haba iai pynpaw ia ka jinglong ba kloi ka Sorkar ban iakren iasuk, u Bah Sniawbha u phah ia ka jing khot sngewbha sha ka HNLC ba kan wan sha ka jingiakren iasuk.
“Ka jingkhang ka plie na ka bynta ka jingiakren iasuk bad ka HNLC. Ha ka jingshisha, kila wan sha ka jingiakren iasuk ha ka kyrdan u Myntri kam Pohiing bad haduh mynta ka jingkhang ka dang iai plie. Ngi kwah ia ka jingsuk kaba neh slem ha Jylla bad ban pynthikna ia ka suk ka sain ka don ha Jylla” ula ong.
