Shillong, Nailur 19 : Ki Tnad treikam ka Sorkar Jylla ki khlem pat lah ban aiti ia palat 215 tylli ki Utilization Certificate (UC) halor ka jingpyntreikam ia ka song pisa ba kot haduh T. 1765.86 klur.
“Ngi la shem ba haba kut jong u Lber 2021, 215 tylli ki UC ba T. 1765.86 klur ym pat shym la don jingkhein ha ka kot buh jingkhein jong u Accountant General (Accounts & Entitlement) Meghalaya” ong u CAG ha ka kaiphod.
Kala kdew ba ki Tnad kiba khlem lah ban aiti ia ki UC bad ka percentage na ka pisa ba dang sah jong ka Grant-in-Aid ki dei ki Secretariat Economic Services (Rs 609.91 crore, 34.54 %), Rural Employment (Rs 502.21 crore, 28.44%), Rural Development (Rs 423.11 crore, 23.96%) bad Welfare of SCs/STs and other Backward classes (Rs 115.30, 6.53%).
Ka jingbym aiti ia ki UC ka mut ba ki bor khmih ki khlem pat batai ba haduh katno ka pisa bala dep ban pynlut ha kine ki snem.
Ka CAG ka ong ba da ka jingbym don ki UC, ym lah satia ban pynthikna la ki nongioh ia ka song pisa kila pynthikna ne em ia ka pisa kat kum ka kam bala mang. La ong ruh, lah ruh ban long ba ia kane ka pisa ym shym la pynlut bad la kynshew ha ki Bank Account jong ki Tnad.
Kum ka nuksa, la shem ba ka Tnad Public Works Department (PWD) kala don ia ka jingkynshew pisa ba kot T. 479.12 klur (25.35%) hapdeng u snem 2020-2021 ha kaba haduh T. 515.79 klur bala ioh ka dei naka Grant-in-aid for CSS (Pradhan Mantri Gram Sadak Yojna).
Na ka jingbym don ki UC bala aiti da ka Tnad, ka long kaba eh ban tip ia ka jingpyntreikam ia ki skhim kiba la mang bad ioh ia ka pisa.
“Namar ka jingsahteng ban aiti ia ki UC ka don ruh ka jingma ba lah ban pyndonkam bakla ia ka pisa. Ka dei ia ka Sorkar ban peitpyrman ia kane ka kam bad ym dei ban shu pynbahkhlieh ia ki briew ba dei ban aiti ia ki UC ha ka por kaba dei hynrei ban pyrkhat thymmai ruh ia ka rukom pyllait ia ki grant sha ki Tnad ki bym lah ban pynbiang ia ki UC” ong ka CAG.
