Shillong, Nohprah 19: Ka Sorkar Jylla ha ka sngi Thohdieng, kala aiti ia ka jaka ha rud pung Umiam ban tei ia ka Taj Umiam Resort & Spa- ka five-star luxury resort ba T.330 klur.
U Myntri Rangbah ka Jylla Conrad K Sangma ula iadonlang ha kane ka jingaiti ia ka jaka ha ryngkat u Myntri kam jngohkai Timothy D Shira, Myntri ka tnad GAD Bah Sosthenes Sohtun, Chairman ka MTDC Marthon Sangma lem bad kiwei ki heh Sorkar.
Kane ka five-star luxury Resort kan dei ka project pynbiang iing basa kaba hehduh ha Meghalaya.
Haba pynkynmaw ia ki jingiohi jngai jong u Myntri Rangbah barim (L) PA Sangma, u Conrad ula ong ba ha ki Snem 1988, u (L) PA Sangma ula pynwandur ia ka pung Umiam kum ka jaka wankai ba hakhmat eh ia ki nongjngohkai, bad buh nongrim ia kiba bun ki jingtei ba iohi mynta.
“Kaei kaba iohi jngai da ki phew Snem mynshuwa la pynwandur ia ka ha kawei pat ka kyrdan mynta” ula ong.
Haba pynpaw ia ka jingsngewnguh, u Myntri Rangbah ula ai khublei ia u Myntri kam Jngohkai, ki Ophisar ka Tnad, MTDC bad baroh ki Kynhun ba don bynta namar ka jingpyrshang ba khlem thait ha kaban pynurlong ia ka jingiohi jngai sha kaba jia shisha.
Da ka jingaiti ia ka jaka ban tei ia ka Taj Umiam Resort &Spa, ka Shillong kan don mynta haduh saw tylli ki nongkynti five-star, ha kaba artylli kila treikam bad kawei ka ban dang mih. Ka jingwan jong ka Taj Brand ha Umiam lah khmih lynti ba lan wanrah jing kylla ha ka thain, kan plie lad shibun ha ka iohkam iohkam, pynkhlain kamai ia ki nongkhaii trai Jylla bad nang pynkhlain ia ka kyrdan ka Meghalaya kum ka World-class Tourism Destination.
“Kane ka dei tang ka jingsdang” ong u Myntri Rangbah bad bynrap “Da ka jing kynshew pisa ha ki kam kiba dei, ka jingiashimbynta lang ki paidbah bad ka plan ba iohi jngai, ka kam jngohkai kan iai long ka engine ka roi ka par ka ban pynmyntoi ia baroh ki nongshongshnong ka Meghalaya”
Ula ong ruh ba kane ka kam kan dei ka jingsdang ba thymmai ha ka lynti iaid ki kam jngohkai. ” Ka Meghalaya ka pdiang kumba 16 lak ki nongwankai ha u 2024, bad ngi antad ban tam ia ka 20 lak ka jingwan ki nongjngohkai hapoh i 2028. Da ka jingdon ia palat 300 tylli ki jaka jngohkai, ka kolshor kaba riewspah bad ka spah mariang ka bym lah ianujor, ka Jylla kala nang paw kum ka jaka jngohkai ba khring bha hapoh ka ri bad ha ka pyrthei” ula ong.
Ula pynpaw ba naduh u Snem 2018, ka kam jngohkai ha Meghalaya lah iohi ba kala roi khlem sangeh bad mynta la iathuh kum ka karkhana, kaba nang pynsuk ban khring ia ka jingkynshew kam bad iatehlok. Ka kam jngohkai mynta ka synniang haduh 7.7 % sha ka GDP ka Jylla, da ka thong ban kyntiew sha ka 8.8% hapoh u 2032.
U Myntri Rangbah u pyntip ba ka Sorkar Jylla kala pyntreikam haduh 254 tylli ki project kam jngohkai ba shongdor haduh T.3,914.51 klur ba kynthup ia ki iing basa, ki jaka jngohkai bad kiwei kiwei.
Napdeng kine, 26 tylli ki jingtei kiba heh ba shongdor palat T.1400 klur kynthup ka Shillong Ropeway, Mawkdok Skywalk, Meghalayan Cave Experience Centre ha Mawmluh, bad ka Rain & Bamboo Interpretation Centre ha Mawsynram.
Haba kren halor ka jingkongsan ka Umiam, u Myntri Rangbah ula ong “ka Umiam ka dei ka jaka ba nyngkong eh kaba pdiang ia ki nongwankai sha Meghalaya, tang 17 km na Shillong bad 14 km na Umroi Airport, ka dei ka khyrdop sha ka Jylla bad kan shim ia ka jaka pdeng ha ka plan ka roi ka par”.
Palat T.500 klur la mang ia ki kam pynroi ia ka Umiam kynthup ka Taj Umiam Resort &Spa, ka Luxury Cottage hapoh k PPP, shna pynitynnad shuh shuh ia ka pung Umiam hapoh ka SASCI Project, ka Convention Centre, ki jingtei ba donkam jong ka Water Sports bad kiwei kiwei.
Hapoh ka CM-Meghalaya Homestay Mission, ka Sorkar kala ai haduh 70% ka subsidy ban shna ia ki homestay. Ka bynta bala dep ka kyrshan haduh 800 tylli ki homestay, kaba aikam haduh 1600 ngut bad kane ka mission ba mynta ka thmu ban pynkha sa 3000 tylli ki homestay hapoh u 2028.
U Myntri Rangbah ula kren ruh halor ka jingjop jong ka Meghalaya Concert Economy, kaba hapdeng u Snem 2024 bad 2025, kala khring haduh 3.86 lak ki nongwan sha ki 7 tylli ki concert kiba hehduh. Ka jingkynshew pisa ba T.23.5 klur kala pynmih haduh T.133.42 klur, bad aikam haduh 5500 ngut ki briew ha ka shisngi bad ai jongmyntoi shikatdei eh ia ki samla, ki trai hotel, homestay bad ki dukan ba buh da ki longkmie.
Halor ki lad pyniasoh, ula ong ba ka jingpynjanai ka dang dei ka Kam kaba hakhmat eh, da ka jingdon ki surok kiba bha, ka jingpynheh ia ka kad liengsuin bad ka jingpynpoi surok sha ki jaka ba kyndong eh.
