Shillong, Nohprah 18: U Lat ka Jylla Meghalaya u CH Vijayashankar hynne ka sngi Palei, ula leit leh burom ia u myllung ba pawnam ka ri Khasi u Soso Tham ha ka lyngkhuh sngi iap kaba 85 snem.
Haba kren ha ka jingialang kaba la pynlong da ka tnad Art and Culture, u Lat ula pynpaw ba “Kito ki bym tip eiei ia ka histori kin ym lah satia ban thaw ia ka histori”.
Ula kyntu ia ki khynnah ba ki dei ban pyniasoh bad la ka tynrai ka jong ki bad ban bud ia ka jinglong kaba kordor bad ka jingaiti jong ki longshwa manshwa.
Haba iaroh ia u Soso Tham ba u long u nongialam bad ka jingsngewsarong ha kaba iadei bad ka thoh ka tar bad ki jinglong kiba kordor, u Lat ula ong ba ki kam kiba ula leh kan iai bteng ban long kum ka mynsiem jong ka jingpynshlur ia ka imlang sahlang.
Ula banjur ia ka jingdonkam ban iaid ha ka lynti kaba paka ha kaba iadei bad ka pule puthi bad ka jingpynwandur ia kiei kiei bad ula kyntu ia ki samla ba kim dei ban donbynta tang ha ki jingialehkai bad ka tem ka put hynrei ha kiwei ruh ki bynta kiba iadei bad ka thoh ne dro dur ban don ka jingtei ia la ka jinglong.
Katba u Myntri Sorkar uba khmih ia ka Tnad Arts and Culture, u Bah Sanbor Shullai ula ong, ba u Soso Tham ula long u nongmuna ha ka thoh ka tar hapoh ka ri, ha kaba kiba ula leh kidei kiba la pynwandur ia ka kolshor bad ia ka jinglong tynrai jong u Khasi.
Ula pynkynmaw ruh ba mynshwa ula pule ia ki kot kiba kynthup ia “Ka Duitara Ksiar’ bad “Ki Sngi Barim u HynniewTrep” bad u Myntri ula ong, ba kine ki kam kim dei eh tang ka jinghthaw ia ki jingthoh poitri, hynrei kila pynkhie im ia ki jingpynkynmaw, ka jinghikai ia ka akor ka burom bad ia ka jingsngew trai kum ki paid Khasi.
Haba ai jingkren pdiang, u Principal Secretary ka Tnad Art and Culture, u Bah Frederick Kharkongor ula pynpaw ba u Soso Tham um dei eh tang u nongthoh poitri hynrei u nongiohi jngai uba la wanrah ia ka jingkylla ia ka riti ka dustur jong ka thoh ka tar u Khasi sha ki jingthoh kiba paka ban pynthikna ba yn pynneh pynsah na ka bynta ki pateng ban dang wan.
Ki jingthoh ki jongu kila noh synniang ha kaban pynskhem ia ka ktien, histori bad ia ki rukom leh tynrai, ia kaba lehse kila dei ban duhjait noh katkum ka jingiaid ka por.
Kala don ruh ka jingiakren ha ka jingialang, ia ka jingiai pyrshang ka sorkar jylla ban pynrung noh ia ka Ktien Khasi ha ka 8th Schedule jong ka riti synshar ka ri, ban ithuh ruh ia ka bynta kaba khraw kaba u Soso Tham ula leh ha kaban pynwandur ia ka thoh ka tar bad ia ka jinglong tynrai ha ka riti dustur.
La pynpaw ruh ha kaba iadei bad ka Chief Minister’s Research Grant kaba T.3 lak marwei, ha kaba 48 ngut ki samla pule kila shah jied ha u snem bala dep ban bteng ia ka jingpule ka jongki ha ki mat kiba iadei bad ka khyndew ka shyiap, ka ktien ka thylliej bad ka jinghiar pateng ka kur ka jait. Kala don ruh ka jingpyrshang ban iatreilang bad ki skulbah kiba na kiwei pat ki ri ban leh ia ki jingwad bniah kiba paka ha kaba iadei bad ka kolshor bad ki jingleh kiba rim bajah.
Ha kane ka sngi la ioh ia ka jingrwai na ka Fidelity, ka samla pule jongka Memorial Senior Secondary School bad hadien kane la ioh ruh ia ka jingshad ne Classical Dance kaba la tip kum ka “Notun Ashar Vani”.
Kum shi bynta jong kane ka jingrakhe la sam ia ki khusnam sha ki nongjop ha ki jingiakob ki bapher bapher kiba la pynlong ha ka 15 bad 16 tarik u Nohprah, kaba kynthup ia ka jingiakob thoh poitri, ka jingiakob kyntip, jingiakob shad bad kiwei kiwei kaba la pynlong da ka Sohra Government College bad la wan ban iashimbynta da ki khynnah pule jong ka St. Dominic’s School bad Auxilium Higher Secondary School kidei kiba la ioh ia ki khusnam.
Lyngba kane ka prokram la lum lang ia ki heh ki hain, ki scholar, ki nongthoh, ki khynnah pule bad kiwei kiwei ku mka dak ban kynmaw burom ia u Soso Tham, ia kaba la tip ia u kum u Kpa jong ka Khasi Litreshor.
