Shillong, Nohprah 18 : U Myntri ka tnad Pule Puthi Bah Lahkmen Rymbui ha ka sngi Balang ula ong ba ka Sorkar Jylla kala pyrshang ban pynsngewthuh ia ka Sorkar Pdeng ba kan pynbteng ia ka skhim SSA namar ka jingpynsangeh iaka, kan tyngrong ia ka jingkit ba T.500 klur na ka pla tyngka ka Jylla.
“Lada ka Sorkar India ka pynsangeh ne kam pynbteng shuh, ngin hap ban pynlut nalade ia baroh ka jinglut ba kot T.235 klur tam nalor ka jingpynkiew tulop iaki nonghikai Adhoc bad SSA, ka ban nang tynrong shuh shuh ia ka jingkit ba T.100-300 klur” batai u Bah Lahkmen.
Ula iathuh ha ki lad pathai khubor ba ka Sorkar Jylla kala mad ia kiba bun ki jingeh ban pyndap ia kane ka pisa.
“Ka PAB kala mynjur T.235 klur, hynrei ka Sorkar India kala ai tang T.139 klur, bad ka Sorkar Jylla ka hap pynlut nalade haduh T.72 klur. Kine ki dei ki jingeh ki bym dei satia kiba suk ia ka tnad Pule Puthi lane ka Sorkar ba kan pynbeit tang shisien pynbeit”.
U Myntri ula kyntu ia ki kynhun bapher bapher ba kin sngewthuh ia ki jingeh kiba ka Sorkar ka iakynduh bad ban iatreilang ha kaban iapynbeit ia kine ki jingeh.
“Ngi don hangne ban shakri ia ki paidbah kat kaba ngi lah. Ngim shym la shong ban khmih tang ia kawei ka kam, ngi hap khmih ia bun ki kam kiba donkam ban leh eiei” ula ong.
U Bah Lahkmen ula kular ba ka Sorkar kala kut jingmut ban pynurlong ia ki jingkular bad kyntu ia baroh ba kin don ka jingiasngewthuh lang ia kaei kaba long ba man.
“Ngin pyrshang ban pynbeit ia kine ki jingeh kawei hadien kawei, da ka jingkyrshan u Myntri Rangbah ka Jylla” ula bynrap.
