Imphal, Nohprah 17: Kum shi bynta jong ka jingtohkit halor ka jingkamai pisa be-ain, ka Enforcement Directorate (ED) kala pynlong ia ka jingkhynra ha kiba bun ki jaka hapoh Manipur ha ka sngi Balang.
Katkum ki report, la iathuh ba ym duna ia ka san tylli ki jaka ha Imphal la khynra ha kaba iadei bad katei ka case. Ia kine ki jingkhynra la pynlong ha kaba iadei bad ka jingkynnoh ba don ka jingkamai pisa beain na ki kam khaii droks, kam kaikhlaw, kam bamsap bad ki kam kiba long pyrshah ia ka sorkar India.
Kane ka jingwad ki don ka jingiadei bad u Yambem Biren, uba la shu kam (self style) ba u dei u myntri rangbah jong ka Manipur State Council, kaba la khot ialade, bad u Narengbam Samarjit, uba batai ialade kum u council’s external affairs and defence minister.
“Baroh arngut ki dei ki briew jong ka Salai Group of Companies bad la kynnoh ba ki la lum pisa palat 50 klur tyngka na ki paidbah lyngba ki skhim bei tyngka thok.Ia ka pisa la kynnoh ba la pyndonkam na ka bynta ki kam kiba lam pat sha ka jingpynkhih win bad pynlong thma pyrshah ia ka jylla India,” la ong ka kyrwoh na ka ED.
Ka ED ka la ong ba kane ka kam ka kynthup ïa ka jingpynkhih win, ka jingpynbun ïa ka jingshun hapdeng ki kynhun, bad ka kop ïa ka jingsynshar jong ka ri.
Une u nongshah kynnoh u la shah pynngat case teng mynshwa ha ka National Investigation Agency (NIA) bad ha ka Central Bureau of Investigation (CBI).
Kane ka case ka mih na ka jingïalang bad ki nongthoh khubor ha u snem 2019 ha London, ha kaba la kynnoh ba u Biren bad u Samarjit ki la pynbna ïa ka jinglaitluid jong ka Manipur na ka ri India.
Ka agency ka la kynnoh ba ka Smart Society ka treikam be-aiñ kum ka Non-Banking Financial Company (NBFC), kaba lum pisa na ki paidbah ha ka dur jong ka bai dkhot bad siew biang da ka pisa.
La iathuh ba ki nongseng kam ki la shah pynngop da ki jingkular ban siew ia ka sut kaba heh.
“Ïa ka pisa kaba T.57.36 klur la lum na ki nongbei tyngka hapoh ki skhim bapher bapher bad la thep ha ki account shimet jong ka Salai Group, Smart Society, bad ki nongpynïaid jong ki,” ong ka ED.
 kala pynlong ia ka jingkhynra ha kiba bun ki jaka hapoh Manipur ha ka sngi Balang.){kind=link}