Guwahati, Nohprah 13: U Myntri Rangbah ka jylla Assam Himanta Biswa Sarma ha ka sngi Saitjain u la pynbna ba ka jingtohkit halor ka jingkynnoh pyrshah ia u MP ka Congress na Jorhat Gaurav Gogoi bad iaka lok jong u, ba ki don ka jingiadei bad ka Pakistan un sa aiti sha ka central agency, da kaba kdew ba kane ka kam ka dei kaba sngewkhia bha.
Haba kren sha ki lad pathai khubor, u Sarma u la ong ba kane ka kam ka long kaba eh bad kaba jwat bad ka iaid palat katkum ka jinglah jong ka kynhun Special Investigation Team (SIT) jong ka jylla.
“Ha kaba iadei bad ka case kaba don ka jingeh bad ka jingsngewkhia, kan ym long ba tang ia ka Special Investigation Team jong ka Assam ban tohkit bad sei madan ia baroh ki liang, namar kata ia kane ka kam yn aiti sha ki tnad tohkit jong ka sorkar kmie ban tohkit bniah”, u la ong.
U Myntri Rangbah ka jylla u la bynrap ba ynda ka case ha kaba iadei bad jong u Zubeen Garg ka la iaid sha ka kyrdan ban bishar man ka por, ka sorkar jylla kan sa ai ne ia sam ia ki kot ki sla kiba iadei bad ka kam Gogoi. “Ngin sa aiti ia ki kot ki sla kiba donkam ha kaba kut jong une u bnai ne ha kaba sdang jong u bnai ban wan”, la ong u Sarma.
Wat hapdeng ka tyrwa ban pynkynriah noh ia ka jingtohkit, u Sarma u la pynskhem ba katkum ka jinglap jong ka SIT haduh mynta ki biang ban pynkut. “Kaei ia kaba ka SIT ka la ioh ha kaba iadei bad ka case jong u Gaurav Gogoi ka biang ban shim ban pynkut ia ka case pyrshah ia u ba nongshah kynnoh”, u la kam.
Ka sorkar Assam kham ha mynshwa ka la thaw ïa ka SIT ban tohkit ïa ki jingkynnoh ba la pynpaw da u Sarma pyrshah ïa u Gogoi bad ka lok jong u, ka Elizabeth Colburn, ha kaba ïadei bad ka jingkynnoh ba ki don ka jingïadei bad ka Pakistan’s intelligence agency, ka Inter-Services Intelligence (ISI).
Haba kdew ïa ka jingdonkam jong ka jingïadon bynta jong ka kynhun tohkit jong ka sorkar kmie, u Sarma u la ong ba ki jingeh jong ka case bad ki jingktah ïa ka jingïada ri kin pynlong ïa ka jingtohkit kaba kham bniah, wat haba u la pynskhem ba ki jinglap jong ka SIT ki la kdew lypa ïa ki jingeh kiba sngewkhia bha.
