Hiar jurip u CM ia ka MSPCB | Pynbna ia ki sienjam ban pynkhlain ia ka jingtreikam ka Board

Shillong, Nohprah 11: U Myntri Rangbah ka Jylla Conrad K Sangma ha ka Sngi Palei, ula pynlong ia ka jingkhmih bniah ha kaba iadei bad ka rukom treikam ka Meghalaya State Pollution Control Board (MSPCB) bad ula pynpaw ia ka jingsngewhun halor ka jingiaid shaphrang jong ki kam ki jam.

Haba kren hadien ba la wai ka jingialang, u Conrad ula ong,”Nga sngew ba ka long kaba donkam ban khmih bniah ia ka MSPCB bad nga dap da ka jingkmen ban pyntip ba ngi lah khmih bniah ia ka rukom treikam baroh kawei jong kane ka tnad. Ka jingialang ka long kaba biang bha bad la ioh ia ki jingai jingmut kiba bha bad la iatai kumno ban pynbeit ryntih ia ka rukom treikam jongka Pollution Board ban pynthikna ba ka jingtreikam kan long kaba paka shuh shuh”.

U Myntri Rangbah ula iaroh ruh ia ka jingshimkhia ka MSPCB ha ki snem kiba la leit da kaba ong, “Bun ki kam kidei kiba la leh ha kiba bun ki snem kiba la leit hynrei dang donkam pat ban leh shuh shuh na ka bynta ki snem kiban dang wan”.

U Conrad Sangma ula pynbna ba yn sa pynlong ia ka jingialang ban khmih bniah biang ha u bnai Kyllalyngkot ban iatai sani ban shim ia ki sienjam kiba paka ban pyniar ia ka rukom treikam jong ka Board bad ban pynlong ia ka, kaba treikam kham bha shuh shuh.

“Ngin sa lum sa ia kawei ka jingialang ban khmih bniah ha u bnai Kyllalyngkot ha kaba ngin sa shim ia ki sienjam bad ia ki lad ki lynti ban pyniar ia ka jingtreikam jong ka Board bad ban peit kumno ban pynlong ia ka kaba treikam kham bha shuh shuh ban pynthikna ia ki bynta bapher bapher bad ia ka jingpynkup bor kiba la don lypa katkum ka ain kaba iadei bad ka um, ka lyer bad ka jingiada ia ka mariang, ia kito kiba lah ban iada bad ia kito kiba lah ban pyntreikam” ula ong.

U Myntri Rangbah ula pynpaw ia ka jingkyrmen ba ka MSPCB kan kylla long ka Board kaba khlain bad kaba treikam bha, kaban lam ha kaban ioh ia ka jingkhuid jongka lyer, ka um bad kaban pyrkhing ia ka jingpynjaboh ha ka jylla.

“Nga kyrmen skhem ba ha ki sngi ban wan, ngin sa iohi ba ka MSPCB kan sa kylla long kaba khlain bad kaba treikam bha, kaban lam ha kaban ioh ia ka jingkhuid jong ka lyer, ka jingkhuid ka um bad ka jinglah ban tehlakam ia ka jingpynjaboh ha ka jylla baroh kawei” la ong u Sangma.