Dibrugarh, Nohprah 11: Kumba 21 ngut ki nongbylla na ka jylla Assam la suba ki la iap hadien ba ka trok kaba kit ia ki, kala noh ha ka riat kaba jylliew kumba 1,000 phut ha surok Hayuliang–Chaglagam hapoh ka jylla Arunachal Pradesh ha ka 7 tarik u bnai Nohprah.
Wat lada kane ka jingjia kala jia san sngi mynshwa, hynrei ki pulit ki dang ioh jingtip tang ha ka miet sngi Balang bad mar mar kila leit sha katei ka jaka. Ia ka jingwad ban pyllait wad ia kitei ki briew la sdang ha ka step jong ka sngi Palei.
Kat kum ki jingioh khubor, la iathuh ba katei ka trok ka dang kit ia ki nongtrei sha kawei ka jaka shna ïing, hynrei ka la syntuid na surok bad ka la hap sha ka riat bah kaba jylliew.
Kumba 19 ngut ki nongbylla la iathuh ba ki dei na Gelapukhuri Tea Estate kaba hap hapoh ka Tinsukia district. Kine ki kynthup ia u Budheswar Deep, Rahul Kumar, Samir Deep, Joon Kumar, Pankaj Manki, Ajay Manki, Bijay Kumar, Abhay Bhumij, Rohit Manki, Birendra Kumar, Agar Tanti, Dhiren Chetia, Rajani Naag, Deep Gowala, Ramchabak Sonar, Sonatan Naag, Sanjay Kumar, Karan Kumar bad u Jonas Munda.
Ka tyllong khubor kala iathuh ba kumba long mynta la ioh ban sei ia 13 tylli ki met iap.
U Superintendent of Police ka Tinsukia u Mayank Kumar u la pynthikna ba kitei ki nongbylla ki dei na kane ka District bad ki la leit sha Arunachal Pradesh na ka bynta ban shna ia ka Hostel.
Ka jingpyrshang ban ïakynduh ïa u SP jong ka Anjaw, u Anurag Dwivedi, na ka bynta ban ïoh ïa ki jingtip ba bniah, hynrei kam shym la urlong namar ba ia ka phone ym shym la jubab.
